لتحضير القشطة. لتر من الحليب بضيف عليهم كوب واحد من السميد الناعم وملعقه كبيره من السكر بحركهم كلهم مع بعض على البارد وفورا برفعهم على النار وبستمر بالتحريك على نار هادئه لحتى يبدأو بالغليان ويصير قوامهم جامد رح أضيف ملعقه كبيره ماء زهر وفنجان فستق حلبي وهيك حشوه القشطه صارت جاهزه بخليها بالطنجره او بصبها بصحن كبيره ورح احط على وجها قطعه من النايلون لحتى ما ينشف عنا الوجه وبتركها على طاوله المطبخ لحتى تبرد القشطة

رح احضر عجينه المعمول. عندي كاستين من السميد الوسط وعليهم كاسه ونص من الطحين المنخول وبضيف عليهم كمان نص كاسه سكر وملعقة صغيرة محلب وملعقة صغيرة خميره وملعقة صغيرة كربونه بحرك هاي المكونات الجافه كلها مع بعض بعدين رح أضيف نص كاسه سمنه بدرجه حراره المطبخ ورح افرك السمنه بإيدي لحتى السميد والطحين يتغلفو بالسمنه بضيف عليهم كوب واحد من الحليب الدافي وبالتدريج. اهم شي ما نبالغ بالعجن لحتى تشقق معنا العجينه ولازم تكون متماسكه

بنقسم العجينه قسمين بصينيه مقاس ٣٠ رح احط ورقه من النايلون ورح افرد فيها النص الأول وهاذي حتكون أسهل طريقه لمدها بالصينية رح اخذ هذا الجزء واتركه على جنب

رح ادهن الصينيه بالسمنه ورح احط النص الثاني من العجينه ورح اردها بأيدي او بالشوبك ورح احاول اطلع العجينه على الأطراف. ورح افرد عليها كامل القشطة الي حضرناها. وبعدين رح انزل الجزء الي فردناه من قبل

رح ادهن الوجه بدهنه خفيفه من القطر بالفرشاي لحتى تاخذ لون تحميره. ورح اعلم بالسكينة من فوق السطح ما رح ادخل السكينه لتحت ورح اعمل شويه ثقوب حتى ما تتفتح عنا العجينه

بفرن محمى مسبقا حرارته ٢٠٠ وعلى الرف الوسط حتاخذ عنا تقريبا ٢٠ دقيقه او حتى تاخذ اللون الذهبي على الأطراف برفعها تحت الشوايه وبحمرها

بطلعها وبضيف فوقها القطر البارد وبتركها ٣ ساعات قبل ما اقطعها ورح ازينها بالفستق الحلبي. وصحتين وعوافي