نبدأ على بركة الله، في إناء نحط السميد الرطب والفرينة مع الخميرة والسكر والحليب بودرة نخلط النواشف جيدا ثم نضيف ملعقة كبيرة خل مخلطة مع الماء دافئ.

ملاحظة مهمة: ✔الكيلة اللي استعملتها غرفية متوسطة.

ثم نبدأ نضيف في ماء دافئ حتى نتحصل على عجينة مرخوفة وتلصق شوية في اليد نضربها مليح باش يدخلها الهواء مدة 5 دقايق، ثم نضيف الزيت.

ندخل الزيت مليح في العجينة نغطيها ونخليها تخمر مدة 10 دقائق.

كي تخمر للمرة الأولى نديقازيها ونضربها شوية (هاذ العملية تنقص علنا الدليك)، ونعاود نغطيها ونخليها تخمر للمرة الثانية.

كي تخمر نعاود نديقازيها نغطيها ونخليها تخمر، نكرر هاذ العملية من زوج خطرات إلى ثلاثة حسب الوقت اللي كان عندك وبين كل مرحلة نخليها من 10 دقائق إلى 15 دقيقة على حساب درجة حرارة المطبخ. في هاد المرحلة الثالثة نخليها تخمر على خاطرها حتى يتضاعف حجمها.

كي تخمر للمرة الثالثة والأخيرة نديقازيها (نهبطلها لخمور) وبمساعدة الماء نقطعها إلى قطع متساوية بالتقريب ونرمدهم في السميد الرطب، نحطهم فوق قطعة قماش نخليهم ريحو شوية ونقرصهم ونغطيهم.
ملاحظة: ✔هاذ الكمية عطاتني 7 مطيلعات صغار.

في هاذ الأثناء نشعل على الطاجين باش يحمى مليح كي يخمرو نبدأ نحط الخبيزات في الطاجين وقبل ما تحمار الحبة من تحت لازم نبقى نقلب فيها حتى تبدأ تنتفخ معايا وتدي لون ذهبي جميل.

نحمّرهم على الجوانب كما هو موضح في الصورة وبنفس الطريقة حتى نكمل كل الخبيزات اللي عندي، نحطهم فوق مشبك لحين التقديم.

هاد المطلوع يجي رطب وفارغ من الداخل يمكن حشوه بأي حشو ويقدم كسانديتشات كما يمكن إستهلاكه هكذا مع الجواز أو المرقة، وشهية طيبة للجيع😋🥙😋