بنسيح السمنه ع الغاز والزبده وبنضعها فوق السميد وبنبسهم بس باطراف الاصابع لحتى تتغلغل السمنه والزبده بحبيبات السميد لمده ربع ساعه ونتركهم مغطيين لثاني يوم مع مراعاه بسهم كمان مره لمده ربع ساعه وكل ما طول السميد مبسوس بعطي نتائج احسن ولو طولتي عليه وظل مبسوس اسبوع شهر ما بصرلو شي

بليوم الي بدنا نعمل المعمول فيه بنضع ع السميد كاسه سكر بودره كاسه حليب البودره وكاس الطحين وملعقه المستكه والمحلب ودقه المعمول وبنضع كوب القطر الثقيل وبنضع الخميره الي تركناها تفور

وبنرجع نبسهم ربع ساعه لحتى تختلط كل المواد مع بعضها البعض

وقت العجين بنكون غلينا اليانسون مع الحليب السائل ونتركهم ليبردو وبنضع كاس ماء الورد وكاس ماء الزهر

ما بنعجن كل السميد مع بعضو مره وحده بوخذ الكميه الي بدنا نشتغل فيها وبنضعها بجاط وبنعجنها بخليط اليانسون والحليب وماء الزهر وماء الورد لحتى نحس انو بنقدر نشتغل فيها وما تتشقق ع ايدنا ونحنا بنعمل فيها لانو يعني لحتى توخد حاجتها لانو كثره الماء بتيبس المعمول وكمان شغله ما نعجنهم عجن بس ترديد وضب مش اكتر

بنبلش نكور العجينه ونحشيها تمر او فستق حلبي وبنعملو بشكل الي بنحبو وبنقشو بلمقط الكعك

وبنضع حبات الكعك بصينيه وبنكون محمين الفرن ع حراره ١٨٠ اول بنخبزهم من فوق لحتى النقشه ما تروح يا دوب بس تحمير ع لخفيف وبعدين من تحت

وهيك لنخلص كل الكميه وبنحرص دايمن ما نحرك المعمول وهوي سخن لحتى ما يتكسرو معنا بنتركهم ليبردو شوي بس طبعن بعد ما نطالعهم من الفرن بنغطيهم بورق قصدير ليحافظ ع طراوته وبعدين بنضعه بعلبه محكمه الاغلاق ليظلو طريين

وعند التقديم بنزينو بسكر ناعم رشه خفيفه وصحتين وهنا