نستعين بالله.. بسم الله. عند شراء اللحمة نطلب من اللحام يفرم البصل ويطحنه مع اللحمة. (اذا ما كان عندك فرامة لحمة)

بنجهز البرغل وبنرش عليه الملح والفلفل والكمون وشوية بهار اذا حبيتي تضيفيه.

بنحط اللحمة بوعاء وسيع جاهز للعجن وبنضيف البرغل شوي شوي وبنضيف الزيت والماء وبندعكه مزبوط وبنظل نعجن بكلتا اليدين. بنضيف مكعب مرقة وبنخلطه مع العجينة.

بنضيف الزيت لحتى تصير العجينة متماسكة

بنجهز الطنجرة وبصب بقاعها زيت الزيتون وبنرتب شرائح البصل

بناخذ كمية صغيرة بحجم ضمة الكف وبندعكها مزبوط عشان ما يظل داخلها هواء وبندحبرها وبنرقها بإيدينا الثنتين. وبنحطها في الطنجرة.

بنعمل نفس الشيء لحتى ما تخلص العجينة. بامكانك تدحبريها بشكل طولي 😊.

بامكانك تحطي لحمة خروف ريش فوق البصل وتحت الكباب او دجاج وطبعا مسلوق مسبقا ومستوي. بنركب الطبخة عالنار لحد ما نسمع فرقعة الزيت

بنغمره الكباب بالماء بس مش كامل وبنضيف الملح والفلفل الأسود حسب الرغبة وبنحطه عنار عالية لحد ماتغلي المي وبعد اول غلوة بنوطيه وبنسكر الطنجرة بالغطاء عشان يستوي بالبخار لحد ما تنشف المي عنه

ريحة الطبخة رح تنتشر بالحارة وريحتها زاكية كثير فما بالكم بالطعمة.