المشبك الدمياطي

هنحط كل المكونات على بعض و نعجن بالماء الدافيه انا مش قايله كميه على حسب الدقيق بتاعكوا بس خلي جمبكوا كده كوب ونص ماء دافيه

هنقلب كويس التقليب مهم جداً لنجاحها و كمان اتاكدوا ان الخميرة شغاله معاكوا عشان تدي نتيجه حلوه للعجين و ده القوام الى احنا عايزينه لا تقيل ولا خفيف مظبوط جداً هنغطي عليه و نسيبه يخمر ربع ساعة كده

نعمل السيرب السكر و الماء و عليهم عسل الكلكوز و ليه حطناه عشان عسل المشبك لازم يكون تقيل و بعدين الليمون وعلى النار لغايه لما يغلي متقلبوش بالمعلقه عشان ميسكرش

و بعدين نسيبه يبرد عما نعمل المشبك وده قوامه تقيل و حلو و خلي بالكوا السيرب سر نجاح المشبك لو السيرب مظبتش المشبك مش هيظبط

بعد اما العجينه اختمرت هنحطها في ازازه (قارورة) بس نخرم الغطا بتاعها عشان نشكل او لو عندك ازازه (قارورة) الكاتشب حطيه العجينه فيه و على نار و في زيت سخن هنبدا ننزل بالعجين و نشكل المشبك بتاعنا

وهنسيبك لغايه لما ياخذ اللون الاصفر على كل جهه وكده خلص وناخده وننزل بيه على السيرب على طول

وكده وصفه النهارده خلصت يارب تكون عجبتكوا و لو عايزين تشوفوا الوصفه فيديو هتلاقوها في فيديوهاتي و الف هنا ❤❤