تحضير العجينة: في قصعة نحط فرينة (طحين او دقيق) ورشة ملح نزيد عليها زيت ومارغرين ندخلهم مليح ونضيف بيضة ونلم بماء الزهر حتى تولي عجينة طرية نحلها حربوش ونقسمو على اثنين كل حربوش نقسمو على ستة يشكللنا 12 كرة نخلي كل ستة كرات في كيس بلاستيكي ابيض ترتاح لمدة ساعتين ما فوق

من جهة نكون حمصت كاوكاو ورحيته شوي خشين نضيفله فانيليا وسكر ونفتلو بماء الزهر ما لازمش يتعجن الحشو نخليه يرتاح ساعة

نولي للعجينة بعد ما ارتاحت نحل بكرية واحدة نحلها شوي ونديرلها نشاء ونحط فوق بعضاهم حتى نكمل الكريات الستة بعدها نحلهم مع بعضاهم ونبقا نزيد فلنشاء حتى تولي رقيقة بزاف ونعاود العملية مع كريات ستة اخرين هكذا يتشكلو زوج طبقات كل طبقة فيها ستة طبقات رقيقة

ندهن مول نتاعي بشوي مارغرين ونحط طبقة الاولى نسقمها مليح ونزيد عليها الحشو ونفرشو مليح بتساوي وبعدها نضيف الطبقة اخرى ونعدلها مليح نقطع الاطراف الزايدة ونشكل البقلاوة على شكل مقروطات وكل حبة نديرلها حبة كاوكاو وندخلها طيب من تحت مدة ساعة ونص على150درجة بعد ما تحمر من تحت نشعل من فوق حتى تأخذ اللون الذهبي

بعد ما تأخذ البقلاوة نتاعي اللون الذهبي نحيها وهي سخونة نعسلها بعسيلة باردة ونخليها ليلة كاملة تشرب العسيلة وبعدها نقطعها

بلصحة والراحة