نغربل السميد في قصعة وحط عليه الملح السكر ولخميرة تاع الخبز نخلطهم ومن بعد نضيف الزيت ندخلها مليح فالسميد ونبدا نبل بشوي ونعجن بالتقطاع حتى نتحصل على عجينة طرية نوعا ما نخليها بجنب

ونحط الطاجين يسخن مانخليش لعجين يطلع بزاف ومن بعد كي نحطو فالطاجين يهبط غير نقرصو نحط الطاجين قيس مايسخن الطاجين نحطو يطيب (يستوي) يطلع فالطاجين مع نشوفو بدا يدير النبابل نقلبو ونخليه كي نحس حكمت روحها نبدأ ندور ماش نقلب ندور باش طيب كامل على وجه

ونحوشيها والنار لازم تكون متوسطة ماش قاوية ياسر تتشلفط من برا ولداخل تقعد عجين وماش ناقصة ياسر ثاني طول حتان يمصها الطاجين لازم متوسطة وبنفس الطريقة نخدم القرصات الصغار ونحشيهم بالشاورما ولي فريت والسلاطة والشكشوكة يجيو بنان يسخفو

وبنفس الطريقة نبقى حتان (حتى) طيب من لوجوه في زوج هذا فيما يخص سر الطياب باش تجي طايبة كامل كيف كيف أما سر الطراوة والرطابة بمجرد مانحيها من الطاجين نغمها بطارشونة تحت ووحدة الفوق غير شوي نلقاها رطبت وطرات

نتمنى نكون فدت عزيزاتي المبتدئات ولا لي مايصلحلهمش المطلوع وهذا مطلوع الشرق مانخلوهش يتحل من بعضاه كيما اي مثل خاوتنا ناس الغرب