بسكويت بالتمر 😋🍵

هنحط البيض و عليه الفانيليا في الخلاط و نضربهم سوى بعدين ننزل بالسكر شويه بشويه لحد ما يختفي بعدين بنزل بالزيت خيط رفيع و بس كدا

في بوله هنحط كل المكونات الجافة اللي فوق سوى اللي هي الدقيق و البسكويت و البيكنج باودر و اللبن و النشا ونقلبهم مع بعض بعدين أنزل عليهم بالخليط و اعجنهم كويس لو لقيت العجينه بتشقق ممكن اضيفلها لبن بس ملعقة بمعلقه لحد ما تبقي ناعمه و لينة معاكي و مظبووطه

بعد كدا هتحطي العجينة في الثلاجه لمده نص ساعة في الوقت دا بتجيبي نص كيلو عجوة (تمر)تحطي عليهم ملعقتين كبار سمنة و تقلبيهم على النار لحد ما يمتزجو ببعض انا حطيت كمان رشه محلب يدي العجوه طعم ممكن متحطيش عادي.بعد ما تطري خلاص اقفلي عليها و ابدأي شكليها مدوره و طويلة... رول يعني بس رفيع اوي

بعد كدا هتجيبي العجينة و تدهني الرخامه زيت و تفردي عليها العجينه و ترققيها بس مش اوي يعني ممكن نص سم و بعد كدا هتقطعيها مستطيلات عرضهم مثلا 5 سم أو أقل و طولهم على حسب ما جه معاكي. بعد كدا رول العجوه هتضغطي عليه تبططيه عشان مش يبقى تخين و تحطيه في نص المستطيل دا بالطول كدا

وبعد كدا تقفلي عليه الحته اليمين و تجيبي عليه الحته الشمال بحيث الجنبين يبقو قافلين على العجوه جنب بعض كدا زي القميص مش على بعض عشان متبقاش كتيرة و بعد ما تظبطيه كويس هتقلبي الشكل على الحته الثانية عشان هتبقي انعم

و تجيبي شوكة و تضغطي من النص و تسحبي لاخر الرول المتبطط دا و بعد كدا تقطعيه بالسكينه و تحطيه في صينية مش مدهونه زيت.أول ما تخلصي كل الكمية شغلي الفرن على 180 و لما يسخن دخلي البسكويت هيقعد تقريبا 15 دقيقه لحد ما ياخذ لون من تحت بعد كدا شغلي الشوايه ياخذ لون من فوق وأما تطلعيه مش تغطية عشان مش يبقى طري ويبقى مقرمش لو عايزاه طري غطيه و بالهنا ياحلوين❤❤