في إناء نحط الزبدة تكون طرية و نضيف عليها قرصة ملح و فانيلا و السكر الناعم يكون مغربل و نخلط باليد حتى نتحصل على قوام المرهم ثم نبدأ نضيف الفرينة تدريجيا و تكون مغربلة و نلم بدون ما نعجن و نضيف ماء الزهر و نواصل في اضافة الفرينة حتى تتلم العجينة مالازمش تكون يابسة و لا طرية بزاف و نقسمها على اثنين و نغطي كل وحدة ببلاستيك غذائي و ندخلها للثلاجة لمدة ساعة

بعد مرور ساعة نخرج عجينة وحدة و نبدأ نخدم كي نكملها نخرج العجينة الثانية و نخدمها في قوالب التارتولات و نثقبهم بالفرشيطة ونحط عليهم ورق الطهي يكون مقطع على حساب الحبة و نحط كمية قليلة من البقوليات باش متنتفخش العجينة و ندخلها طيب في فرن مسخن من قبل

كي نشوف الجناب احمرو نخرجهم و نحيلهم ورق الطهي و البقوليات لي حطيناهم و نعاود نرجعهم للفرن و نشعلو من فوق باش يحمارو شوية و نخرجهم و نخليهم يبردو

بعدما يبردو نأخذ حافظة طعام (porte manger) نفرش فيها ورق المطبخ و نحط ليفوندوتارت تاعنا و نغطيهم بورقة أخرى من فوق و نغلق العلبة و ندخلها للمجمد نحتفظ بها لوقت الحاجة قبل ما نستعملوهم فقط نخرجهم من المجمد حوالي 4 ساعات قبل الاستهلاك