صينية كوسة بالصوص الابيض

نشترى الكوسة اكبر شوية صغيرين من بتاعة المحشى ونغسلها كويس ونقطعها حلقات متوسطة الحجم ونشوحها كويس في طاسة مع ملعقة صغيرة سمن بعد كدة نضيف لها ١/٤ م ملح او حسب الرغبة ورشة حبهان ورشة فلفل اسود و ١/٢ ملعقة صغيرة ثوم بودرة ورشة شطة بتبقى حلوة اوي وننقلها على صينية الفرن

بتبقى بقى في الطاسة شوية حاجات كدة لازقة من التوابل والكوسة نضيف ربع كوب ماء كدة ونقلبها علشان تطلع ونضيفها على الكوسة في الصينية خدوا بالكو ان الكوسة دى رفيعة مش الكبيرة فمش هيبقى فيها سوائل كتيرة وده افضل في النتيجة النهائيه لو الكوسة كبيرة بتنزل سوائل كتير وبتخلى البشاميل او الصوص صايص كدة يعنى بعد دخولها الفرن

نأخد نفس الطاسة ونعصج فيها اللحمة انا بشوح اللحمة الاول بدون دهون ثم اضع البصلة المتوسطة ورشه حبهان وملح وفلفل حسب الرغبة و ملعقة صغيرة ثوم بودر وبصل بودر ثم اضع ١/٢ ملعقة صغيرة سمن ويقلب جيداً ثم اضع خليط الفلفل ويقلب وأطفى النار على طول ملحوظة نضع البصل والثوم البودرة في الاخر علشان ميلزقش في الطاسة ويتحرق لان مفيش سوائل في اللحمة

نضع طبقة لحمة على الكوسة في الصينية

نأخذ نفس الطاسة اللي عذبناها معانا النهاردة مكان اللحمة عادي ونضع ٢ كوب ونص لبن بارد وعليهم ٢ ملعقة كبيرة قشطه وادوب ٢ ملعقة كبيرة ونص دقيق في ١/٢ كوب ماء كويس جداً ويضاف للبن واشغل النار مع التقلب المستمر ونضيف الملح حسب الرغبة فقط كدة احلى صوص ابيض

نضيف اخر طبقة وهى الصوص الابيض على اللحمة المفرومة والكوسه كده عندنا ٣ طبقات ونلاحظ ان الصوص ميكونش كتير علشان القوام في الاخر يكون حلو مش سايب

واخدين بالكو ان شوية السؤال اللي في الصينية من تحت دة الربع كوب اللي اضفناة مكان الكوسة والصوص ميبقاش كتير يا دوب بالشكل متخافوش دى انسب كمية بأذن الله بعد تجارب كتيير

تدخل فرن ساخن على الرف قرب الاخير من أسفل لمدة نص ساعة علشان تغلى كدة والطعم يتجانس ممكن نغطيها بورق فويل بس مش لفترة طويلة ممكن ١٠ دقائق بس