نخلط الماء مع الحليب والخميرة و السكر والزيت جيداً بالخلاط ثم نضيف رشة الملح و الفرينة بشكل تدريجي نجمعها بملعقة خشبية مانحتاج اليد تجمعيها فقط بملعقة خشبية العجينة تكون تتلاصق قليلا نتركها تختمر

ومن جهة اخرى نحضر الكريمة في طاوة نحط الحليب مع النشا والسكر والفلون ونخلط جيداً بارد في بارد ونحطها على النار مع التحريك المستمر حتان (حتى) تعقد وتثقال نطفي عليها ونضيفلها رشة فانيلا ونفرغها فصحن ونغطيها وندخلها ثلاجة تبرد من جهة اخرى نجيب العجينة بعد متختمر نقسمها الى كريات متساوية

العجينة هاذي تعملك حوالي 8خبزات (كويرات) نكورهم مليح ونجيب صينية تدخل للفرن نحط علبها ورق طهي و نحط الخبيزات في صينية ثم ندهنهم بصفار بيض و نخليهم حوالي 8 دقائق و ندخلهم للفرن اللي نكون مسخنينو من قبل بعد مطيب من تخت نشعل عليهم من فوق ونخليهم حتان (حتى) يحمارو نخرجهم من لفرن ونخليهم يبردو مليح

من جهة اخرى نطلع شانتيه بالحليب و نضيفلها كريمة لفلون ونخفق جيداً ثم نجيب البريوش تاعنا (الخبيزات) نقسمهم على اثنين و نحشيهم بالكريمة التزيين اختياري انا دهنتهم من فوق بالمعجون مخفف بماءزهر و رشيت شوي جوز هند وشوي كاوكاو (فول سوداني) مرحي وشهية طيبة