أولا نبدأ بالعجين، نحضر كل المكونات ونسمي الله، في إناء نحط كل المكونات عدا الملح والفرينة نخلط مليح حتى تنسجم المكونات استعملت في العجينة القليل من الكركم والثوم بودرة عطاها مذاق ولون شباب

ونبدى نضيف في الفرينة بالتدريج حتى نتحصل على القوام المطلوب يجي عجين طري وما يلصقش في اليد نغطيها ونخليها تخمر ما ننساش الملح بطبيعة الحال

في هاذ الأثناء نحضر الحشو: في مقلاة حطيت شوية زيت يسخن، رميت عليه البصلة المقطعة رقيق والثوم المبشور، خلطت مليح وضفت التوابل (الملح، الكركم، الكمون، الفلفل الحمر، الفلفل الأسود) قليتهم مليح وضفت حبة فلفل أخضر مقطعة حتى هي رقيق خلطت مليح

وضفت حبة جزر مبشورة، وحبة قورجات حتى هي مبشورة خلطت المكونات، وزدت حبة طماطم مقطعة قطع صغيرة

مرقت بصف كاس ما ء غالي، غلقت عليها وخليتها طيب ونشفت من الماء وقبل ما نطفي ضفت القليل من الزيتون الأسود منزوع النواة مقطع و2 علب طون الطماطم خلطت مليح وضفت القليل من الزعيترة حكيتها بين يدي حركت وطفيت عليها النار وخليتها بردت تماما عاد استعملتها.

نولي للعجينة، كي تخمر نخويها من الهواء قطعتها إلى قطع متساوية عطاتني 08 قطع نبدأ بالأولى نحلها رقيق نحط الحشو في الوسط لازم يكون بارد مليح (باش ما يقطعش لعجينة) نحط كمية لاباس بيها نزيد الجبن الأبيض (استعملت شاف ذوق شاورما) ونزيد من فوق الجبن الأحمر مبشور أو حسب المتوفر.

ونغلق على شكل مستطيل نبدا بالأطراف ونطوي، اللي نكملها نحطها طيب بلا نخليهم يخمرو.

نطيبهم في الطاجين الثقيل، كي نقلب الحبة نمسحها بالقليل من الزبدة تعطيها مذاق رائع ولون ذهبي، نطيبهم على كل الجهات، نكمل الكمية بنفس الطريقة

ويقدم بألف صحة وهنا، يجيو فارغين من الداخل وطريين بزاف.