اول حاجه هنسلق البطاطا وبعد كده نقشرها وبعد كده نهرسها كويس

ثاني خطوه نعمل البشاميل المسكر هنغلي اللبن وبعد كده نجيب حله صغيره نعمل فيها الرو تسيح السمنه وننزل عليه بالدقيق ونقلب لحد اما يلمه مع بعض وننزل علي اللبن ونقلب كويس بالمعلقه أو المضرب السلك لحد اما نحصل علي القوام الي احنا عايزينه في ملحوظه مهمه اللبن هنضيف عليه السكر عشان يبقي محلي واخر اما نعمل البشاميل ونقفل عليه النار ونضيف الفانيليا

هنجيب الصينيه ندهنها سمنه ونرش شويه بقسماط ونحط حوالي معلقتين كبار من البشاميل ونفردها وبعد كده هنحط البطاطا المهروسه ونفردها كويس ونساويها وبعد كده هنجيب شوكه ونبدأ نخرم في البطاطا بالشوكه علشان لما نحط الصوص عليها تشربه كويس ونحط الصوص ونرش شويه بقسماط من فوق علشان تقرمش وتديني لون حلو

اخر مرحله هندخلها الفرن لحد اما تتحمر ولو متحمرتش كويس نفتح الشوايه

ونطلعها من الفرن ونسيبها لحد اما تبرد خالص وبعد كده نقطعها وبألف هنا وشفا