اليوم وصفتنا وصفة قديمة كثير وبسيطة توارثناها من ستّي. وهي أول وصفة بشارك فيها لحملة #الزيت_عماد_البيت ❤️ خلطة مخلّل الخيار والجزر والزهرة والفلفل الرومي بزيت الزيتون. من أطيب الخلطات ومن كثر ما بحبها، قبل ما أتزوج إذا كانت إمي طابخة أكلة ما بحبها، كنت أتغدى على هذه الخلطة لحالها غماس 😋 ولهلأ ما يستغنى عنها وبحبها مع الفطور والغداء والعشاء ولولا العيب باكلها سناك كمان 😄
‎ ودائما مخزنة مرطبانات 😉

الكميّة حسب الرغبة ‎بنفرم كل الخضار وبنضيف عليهم ليمون مقشّر ومفروم. تقريبا لكل مرطبان كبير (٣ لتر) ٣ ليمونات وسط وطبعا حسب حجم الليمون بنضيف أو بنّقّص. بنضيف كمان ثوم مفروم حسب الرغبة وفلفل حار. بنخلط كل المكونات مع بعض.
‎

أنا بالعادة إذا عاملة كمية قليلة، بكبسه بزيت زيتون لحاله. بس لما أعمل كميّات كبيرة، بضيف زيت زيتون على الخضار وبخلطهم منيح وبتأكد إنه كل الخضار تغلّفت بالزيت، وبعدين بكبسه بماء وملح، وآخر اشي بضيف زيت زيتون زيادة فوق الخضار وبتأكد إنهم مغمورين قبل ما أسكّر المرطبان. ‎وانتو الكم حريّة إختيار الطريقة الي بتناسبكم.

عيار الملح للماء: لكل ١ كوب معياري ماء ١ م ك معيارية ملح، أو لكل لتر ماء ٧٠ غ ملح (يعني ٤/١ كوب ملح) ‎وإذا حابّين تكبسوا بس بزيت، بتضيفوا الملح على الخضار بتخلطوهم مع بعض قبل ما تعبّوا بالمرطبان. ‎بنسكر المرطبان وبنستنى عليه تقريبا أسبوع ليجهَز، أو حسب الجو، ممكن يحتاج أكثر أو أقل شوي. ‎أنا بحب أخلّي تحت المرطبان صينية أو صحن كبير لإنه السوائل بتفور وبتعجّب على الدنيا ☝️‎وصحتين وألف عافية 😘