نديرو في قصعة السميد مع السمن والزيت (كيلة فايضة بمعنى ديري نصف سمن او زبدة والنصف الاخر تكمليه زيت حتى يسيح من الكاس)

ونضيفو الملح ونبسسو السميد مليح وبعد نبدى نضيف في الكيلة تاع الماء تدريجيا حتى نكملها

تجينا العجينة تشبه لتاع المقروظ نفرشها في بلاطو وندخلها طيب في الفرن حتى يحمار من تحت ونحمروه من فوق

بعد منخرجوه من الفرن تحبي تسيريه على سيار او انا رحيتو في روبو ومرحيتوش ياسر وبعد فوتو في السيار

وبعد رشيه بالحليب(كيلة ونصف تاع الحليب اقسموها على زوج) وخليه يشرب مليح وبعد حطيه يفور

بعد ما يفور نحيه وزيدي رشيه بكمية الحليب المتبقية وخليه يشرب مليح وبعد حطيه يفور

بعد ميفور زيديلو السكر ورشيه بماء الزهر وخليه يشرب مليح وزيدي رجعيه يفور

والتزيين اختياري انا درت سكر ناعم مع جوز ولوز وبصحتكم

كي تحبي تخدمي كمية كبيرة متعسليشو كل عسلي بالمقدار لي تحتاجيه والباقي ديريه في بورت مونجي وحطيه في المجمد راح يبقى كيف هو وحتى اذا غلطتي عسلتيه تقدري تخبيه عادي واذا جيتي تقدميه ولقيتيه ناشف زيديلو زبدة وعسل

والله مبخلتكم إلي نعرفو قلتهولكم ❤