نفصل بياض البيض عن الصفار ونطلعو البياض بيض مع رشة مليح ، حتان يطلع مليح و يولي ثلجي ، مانطلعوهش بزاف باش مايهبطش ونحطوه جانبا.

نطلعو صفار البيض مع السكر مدة قصيرة حتتان يبدا يذوب ،و نزيدو كمية قليلة من بياض البيض لي كنا طلعناه باه يساعد السكر يذوب في الصفار، كي نكملو نطلعوه ، نزيدو نخلطو لي بقا من بياض البيض (نخلطو من التحت للفوق باش مايهبطش الخليط و يفسد دون استعمال الباتور)

نقسمو الخليط على زوج ، نصف نخلوه ذوق فاني ، و النصف الاخر نزيدولو كاكاو و نخلطو.

نجيبو بلاطو الكوشة ، لي كلل وحدة متوفر عندها (40 على 40 سنتيمتر) ديرولو ورق الطهي و اقسميه على زوج بالتساوي، النص الاول حطي فيه الخليط ذوق فاني ، و النص الثاني ذوق شوكو وحطيه في الفرن لي تكوني سخنتيه.

انا ماشعلتلوش من لفوق باسكو ييبسلي ، طيبتو من التحت و طابلي من الفوق ، و ماشعلتلوش ، و لي بغات تشعللو ماطولش عليه باش ماييبسلهاش ، مبعد ماتجبديه ، روليه هكاك سخون بورق الطهي ، روليه بطريقة معاكسة ، ذوق شوكو روليه جيهة ذوق فاني وذوق فاني روليه جيهة ذوق شوكو و يتلاقاو في النص ، منبعد نحي البابي كويسون و عاودي روليه و قلبيه و خليه يبرد هكاك و هو مرولي.

طلعي كاس كريمة الشونتيي مع كاش غير ربع حليب بارد ، نعطيكم فكرة ، نص كريمة الشونتتيي خليه كيما راهو ، و النص لوخر زيديلو كمية من دانات شوكولا باه يمدلك ذوق شوكولا و لا اروع.

يكون الرولي برد ، عاودي افتحيه ، النص نتاع فاني ديرولي كريمة عادي ، و الذوق شوكولا ديرولي كريمة بذوق الشوكولا و ديري الفاكهة لي عندك على الجوانب كيما انا كان متوفر عندي التفاح ، ايذا عندك الموز ديري ، و روليه هكاك على الفاكهة باش تجي الفاكهة محشية في نصف الرولي