هنحضر الاول الشربات بنحط المايه وضعف الكميه سكر ومعلقه العسل ونقلب ونحطها على نار متوسطه واول ما تغلى نحط الفانيليا وعصره اللمون ونقلب شويه لحد ما نحس القوام تقل حاجه بسيطه ونقفل عليه عشان محتاجينه يبرد لحد ما نجهز بلح الشام

بلح الشام بقا بنحط ف حله على البارد المايه والزبده او الزيت والسكر ونقلبهم ونحطهم على نار متوسطه

بنحط رشه الملح على الدقيق المنخول ونقلبه وبمجرد ما تغلى المايه والزبده والسكر نحط الدقيق ونقلب بمعلقه خشب مثلا لحد ما تتكون عجينه ناعمه بنعجنها لمده ٣-٤ دقايق (بنفردها ونلمها وندوس عليها بالمعلقه كويس ونتأكد ان مفيش اى تكتلات دقيق) على نار متوسطه

وبعدها بنحط النشا عليها ونقلبها بالمعلقه الخشب ونخرج منها السخونه وبعدها بنبدأ نلمها ب ايدينا وندخل فيها النشا كويس

نخرج العجينه من الحله لبوله عجن و نسيبها ٥ دقايق من غير اى تقليب

هتكون عجينه ناعمه جدا بتكون بردت بنبدأ نحط بيضه والفانيليا ونعجن لحد ما ترجع عجينه ملزقه شويه ونحط البيضه التانيه ونعجن لحد ما تتلم معانا والبيضه التالته ونكمل عجن بنستخدم مضرب او معلقه خشب او ب ايدينا كله ينفع

كده العجينه جهزت بنجيب كيس الحلوانى او القمع وبنملاه بالعجينه وعشان نطلع شكلها كويس من غير ما تبوظ الحروف بتاعتها ونظبط مقاسها بنستخدم ورق زبده او ورق عادى بندهنه زيت وبنبدأ نشكل عليه بلح الشام وممكن نستخدم مقص واحنا بنقطع بلح الشام عشان تكون نهايته مقفوله كويس بس انا مبستخدمهوش

بنطلعه على الشربات على طول وبنسيبه فيه دقيقتين لحد ما يشربه ونخرجه ونقدمه وبألف هنا على قلوبكم ❤