غراتان البطاطا والزيتون والدجاج

في طنجرة نحطو القليل من الزيت نضيفو عليه البصل المفروم رقيق و صدر الدجاج و نضيفو الملح و التوابل و نخليوه يتقلى من بعد نضيفو الزيتون المقطع و المعدنوس و نخليوه يتقلى مليح من بعد نمرقو و نغلقو الطنجرة و نخليوه يطيب جيدا

و في هاذ الوقت نكونو قطعنا البطاطا مربعات صغيرة و درنالها القليل من الملح و قليناها كي يطيب الدجاج و الزيتون نحيو الدجاج نقطعوه و نحيو الزيتون في المول نحطو البطاطا نزيدو فوقها الزيتون و الدجاج المقطع و رشة من المعدنوس

و المرق لي تحصلنا عليه نضيفولو ملعقة فرينة و نحطوه على النار و نحركو جيدا حتى نتحصلو على خليط مثل صوص البيشامال نفرغو الخليط من الفوق و نزيدو عليه الجبن المبشور و ندخلوه للفرن حتى يذوب الجبن و بصحتكم