أول حاجة نقي الفولات (المخاصي) ونحيلهم الجلدة الفوقانية ووحتى الكلاوي نقيهم ونقطعهم شرائح هما والطيحان أما الفولات نقطعهم مربعات ، ونحطهم في إنائين منفصلين.

واحد نحط فيه الطيحان والكلاوي مع التتبيلة (الملح، الكمون، الكركم، الفلفلة حمرة، الفلفل الأسود، القليل من الثوم غبرة) نخلطهم مليح ونخليهم يتشربو التتبيلة بجيه، والإناء الآخر نحط فيه الفولات مع نفس التتبيلة نمزج المكونات ونخليهم حتى هما يتشربو التتبيلة.

في مقلاة نحط شوية زيت تسخن نضيف عليها البصلة المقطعة رقيق (يمكن طحنها في الآشوار) نخليها تذبال شوية نكحزها على طرف المقلاة ونحط الثوم المبشور حتى هو يتقلى من بعد نمزج المكونين ونضيف الطيحان والكلاوي في الأول لخاطر يديو شوية طياب مقارنة بالفولات.

نخلط مليح حتى تنسجم المكونات كي يدخلهم الطياب نضيف عليهم الفولات (المخاصي) نحرك ونغلق عليهم ونخليهم يطيبو على نار متوسطة.

كي يطيبو ويتجمرو مليح وتعقد لاصوص وقبل ما نطفي نضيف المعدنوس المقطع رقيق والقليل من القصبر الناشف نحرك مليح حتى تنسجم كل المكونات ونطفي.

ويقدم الطبق بألف صحة وهنا.