نبدأ على بركة الله بالحشو أولا: نحط في مقلاة البصل مقطع قطع صغيرة في شوية زيت نخليها تتقلى شوية ونزيد الثوم المبشور، نقلي شوية ونضيف الزرودية (الجزر) مبشور نحرك مليح ونخليه يذبال.

ثم نضيف القورجات المرابية نحرك مليح ثم نضيف الفلفل الأخضر المقطع قطع صغيرة نخلط تالكل جيدا ثم نضيف اللحم المفروم ونخلك الكل.

نزيد الطماطم المقطعة مربعات صغيرة نخليها تتقلى 05 د ثم نضيف الطماطم المصبرة كنت حليتها في نص كاس ماء غالي حركت الكل جيدا وفي الأخير ضفت التوابل (الملح، الفلفل الأسود، الكركم، الثوم غبرة، القصبر ناشف، توابل اللحم) نخلط الكل جيدا ونخليها طيب على خاطرها.

وقبل ما نطفي نزيد ملعقو صغيرة سكر ورشة من الزعيترة نخلط مليح ونخليها حتى تنشف من السوائل ونطفي عليها ونخليها تبرد لحين الإستعمال.

في هاد الوقت نروح نوجد العجينة: في إناء نحط كاس حليب دافيء والخميرة والسكر والزيت و2 ملاعق كبار فرينة نخلط بالفوي، نغطيها ونخليها تتفاعل مدة 10 د.

كي تفوت 10 د نضيف خمارة الحلويات والملح ونبدا نلم بالفرينة حتى نتحصل على عجينة متماسكة وطرية في نفس الوقت.

ندخل مليح هاذيك الزبدة (المارغرين) في العجينة حتى تتجانس وتولي عجينة خفيفة وطرية نغطيها ببافي فيلم وفوقو سربيتة ونخليها تخمر.

كي تخمر تقريبا مدة 30 دقيقة، نديقازيها (نخرج الهواء منها) ونقسمها إلى كريتين متساويتين.

نحل الكرية الأولى نحطها فوق صينية، وندير ثقوب بالفرشيطة نزيد الحشو يكون بارد ومن الأحسن يكون ناشف من السوائل (باش لعجينة ما تتقطعش) نسرح الحشو مليح بلا ما نوصل للأطراف، نضيف الجبن حسب المتوفر (استعملت الطري وجبن الساندويتشات وجبن الشيدار)، ندهن الجوانب صاير داير بالماء.

نغلق بالكرية الثانية نكون حليتها مليح ونأكد على الأطراف باش تلتصق العجينة مع بعضها، نبيكيها (ندير ثقوب) من فوق بعود الشواء. وندير خطوط متقاطعة بأطراف الأصابع كما هو موضح في الصور نغمس يدي في زيت الزيتون ونمشي مع ديك الخطوط.

ندهن الوجه بصفار البيض المخفوق مع القليل من الحليب والقليل صلصة الباربيكيو (يعطيها لون شباب) وفي ذيك الخطوط ندير جبن الموتزريلاّ.

وزينت بشرائح الزيتون الأخضر ورشة من فوق بالجنجلان. ندخلها للفرن المسخن مسبقا على نار متوسطة، كي طيب من تحت نشعل عليها من فوق، نخرجها ونمسحها مسحة خفيفة بزيت الزيتون تجي طرية وبنينة، نحطها فوق مشبك تهدا شوية عاد نقدموها.

ملاحظة: هاذيك المسحة في الأخير نتاع زيت الزيتون تزيدلها في البنة وتعطيها لمعة شابة.

وتقدم بألف صحة وهنا.