نحضر كل المكونات ونبدأ باسم الله، في طاس أو إناء نحط البيض مع رشة الملح ولفاني والسكر ونضرب بالباتور (المضرب الكهربائي) حتى يصبح الخليط كريمي.
ملاحظة مهمة: ✔ إضافة الفاني الداكنة يعطي لون جميل للكيك مثل المحلات تماما.
✔ الكاس اللي عبرت بيه الفرينة يرفد 180 ملل

نضيف المارغرين (تكون بحرارة المطبخ) وندخلها مليح ثم نضيف الزيت بالتدريج وفي الأخير نضيف الحليب بالتدريج مع الخلط المستمر.

نضيف ملعقة صغيرة من عطر الزبدة نضرب ثم نضيف النواشف (الفرينة والخمارة مغربلين) حتى هما ندخلهم بالباتور حتى تتجانس كل المكونات.

الخليط يجي ثقيل نوعا ما، فرغتو في المول (ما دهنتوش فرشتو بورق الزبدة فقط) ومررت في الوسط بالسكين، ندردر من فوق القاوقاو أو اللوز إفلي ونخليه يرتاح تقريبا 15 د.
ملاحظة: عند تمرير السكين في الوسط يساعد في تهوية الكيك منين يكون يطيب ويساعد في التشقق أيضا.

ندخل المول للفرن المسخن مسبقا، 10 د الأولى على نار مرتفعة ومن بعد نقص أقل من المتوسط ونخليه يطيب على خاطرو، كي تفوت 40 دقيقة نحل ونشوف إذا كان طاب ولا عاد خاصو المهم إذا صبتوه بدا يحمار من فوق ديرو قطعة من ورق الألمنيوم غلفوه بيها وخليوه يكمل الطياب، قبل ما نخرجوه نشعلو عليه من فوق مدة 5 دقايق يدي لون موحد ونطفي. مدة الطهي دات معايا تقريبا 50 دقيقة.
ملاحظة مهمة: حطيت المول فوق صينية عاد دخلتو للفرن، هاذيك الصينية تساعد باش الحرارة تتوزع بشكل متساوي الفرن اللي عندي ما فيهش المروحة.

ويقدّم بألف صحة وهنا.