نقطع الفراخ شرائح ونتبلها بملح وفلفل وشطة وبصل لو متوفر ونسيبهم على جنب ساعة وبعدين نشوحهم في شويه زيت او نقليهم زي البانيه ونقطعهم بالطريقة اللي نحبها مكعبات او صوابع

نسلق المكرونة كالمعتاد في ماء مغلي وملح

نجيب حلة تكون وسط علشان تستوعب الصوص والمعكرونة 😋
نحط السمنة والدقيق والثوم اول مانشم ريحه الثوم نحط اللبن بارد علشان ماتكلكعش والمايه ونقلب لو كلكعت منك يبقى بالهاند بلندر واضربيها او مضرب سلك ولو عندك قشطة اللبن حطيها بردو مش بتخسر ومن غيرها حلوة بردو 😘

نحط بعد كده المرقة والفلفل الأسود والثوم البودر ودا اختياري
لو عايزاها حراقة حطي شطة لو لا يبقى بلاش (بلاش الملح لحد مانخلص كله لان في حاجات فيها ملح)

الصوص يبقى تقله وسط مش تقيل زي البشاميل ولا خفيف ماء.. لو تقل منك حطي شويه لبن او ماء ولو خفيف ومش عايز يتقل خالص دوبي ملعقة دقيق في شويه ميه صغيرين وضيفيهم وقلبي بالمعلقة❤️

بعد الصوص مااتظبط نظبط الملح بتاعنا وناخد بالنا لو هتحطي زيتون يبقى الصوص مش ملح كتير علشان هيبقي حادق وبعدين نحط المكرونة بتاعتنا والفراخ ونقلب كويس واي اضافات اختياري ممكن تتحط زي المشروم والزيتون والموتزاريلا

بعد كده ممكن نغرفهم ونأكل كده بالف هنا ونرش على الوجه رومي مبشور اللي فضل مننا ❤️
وممكن نحطهم في طبق او طاجن وعلى وشهم جبنة رومي اللي فضلت مننا وياسلام لو في موتزاريلا وعلى الشواية تأخذ احلى لون 😋