من بعد نغطيها ونخليها حتى تخمر و يتضاعف حجمها ومن بعد نجيبها ونقطعها على دوائر تحبو ديروها كبار ولا صغار كيما تحبو كي ديروهم كبار يعطيوكم ثلاث خبزات وإذا درتوهم صغار يعطيولكم أربعة خبزات ونجيب طرشونات نضاف ويكون شوية كبار إذا درتو العجينة نتاعكم تتلاسق بزااف راح تحتاجو الفرينة باش تقدرو تخبزوها وماتلسقش أنا ماستعملتش الفرينة لأنو العجينة نتاعي جاتني سوا سوا من بعد نحلها بالحلال أنا مانحبهاش تكون خشينة بزااف ولا رقيقة بزااف يعني فالنص نحل كامل الخبزات نتاعي على شكل دائري

نغطي الخبزات نتاعي ونخليهم يخمرو للمرة الثانية والأخيرة وبجيه نكون حطيت الطاجين نتاعي الطين نتاعي يسخن فوق الطابونة الكسرة لخنيرة باش تنجحلكم لزملها النار قاوية ولازم تحرفوها (تحركوها) وتعسوها باش ماتتحرقش بعد ماتخمر ويسخن الطاجين مليح راح نحطها فوق النار بحذر إذا تخافو منها تفسدلكم كي ترفدوها باش طيبوها ديرولها الفرينة بصح كي تتعودو عليها راح تجيكم ساهلة كي تهزوها وبلا فرينة نحطها الطيب وكي تبدأ تتنفخ راح نثقبها من الجنب بالسكينة باش مايفسدليش شكلها وراح نقلبها

وراح نحرفها فوق الطاجين باش تتجيني طايبة من كل الجوايه كيف كيف ومن بعد نحوشيها (يعني نطيبها من الأطراف)ونقطعها ونقدمها وبصحة ولهناء 💜💜😋