بصي بقي تجيبي البطاطس تقشريها وتقطعيها دواير ومش ترقيها وبعدين تغسليها وترصيها في الصينية وتحطي عليها زيت وترشي زعتر وملح وفلفل اسود وتدخليها في الفرن الساخن لمدة 20دقيقة وبعدين تجيبي الطاسة وتحطي شوية زيت وعليهم البصل شوحيه وتنزلي بالفراخ المتقطعة عليهم وعليها المكعب وتنزلي بالفلفل المتقطع عليهم وتقلبي وبعدين التوم المفروم وبعدين معلقتين صلصة وقلبي لحد ماتلاقيه نص سوا كده متحروقيش يعني والتوابل بتاعتك بقي تنزلي بيها كلها

نعمل البشاميل بقي وهو عبارة عن ايه تجيبي السمنة تسيح تنزلي بالدقيق ياخد اللون بتقليبك بالمضرب تنزلي بالمرقة وبعدين اللبن واضربي وانتي بتضربي تنزلي بجزء من البيضة اوعي تقفي من تقليبك احسن البيض يستوي وتحطي مكعب وفلفل اسود وتقلبي وبكده يبقي جهز البشاميل اوعي تتقليه لازم يكون خفيف يعني وسط مش مكلكع

هتجيبي صنيتك اللي فيها البطاطس تحطي عليها الفراخ اللي شوحتيها ع البطاطس وبعدين البشاميل بقي وتحطي باقي البيضة بعد ما تكوني ضربتيها بالملح والفلفل تساويه ع البشاميل كده من فوق وتدخليها الفرن في الوسط ع درجة حرارة 240وتولعي الشواية تلاقي الوش اتحمر تطفي وتسيبي من تحت شويه بتاخد تقريبا30دقيقة وبألف صحة وهنا