بعد بسم الله و الصلاة على رسول الله
نبدا بالغرس نقيه نرحيه نضيفلو م ك زبدة جلجلان محمص قرفة قرنفل شوي ماء زهر ونعجنو حتى يولي طري

بعدها نحط الدقيق والفرينة نضيف البسوس او كمية السمن والزبدة الباردين ونحك مليح بين يديا حتى يتشرب كامل الدقيق ليدام ونعرف البراج الا مليح لما نشكل كرة نضغط عليها بيدي ونرميها تبقى كما راها الا تفتحت يعني نزيدو شوي بعدها نضيف الملح السكر و العسل الجلجلان ندخل كلش في العجين ونبدا نجمع بالماء وماء زهر راح ياخد كيلة كاملة ونخليه يتشرب انا خليتو حوالي ساعة

نقسم العجين لكريتين وحدة اكبر من وحدة نطرح العجين الصغير فوق بلاستيك نطرح الغرس بنفس الحجم نقلبو فوق العجين نطرح العجين الثاني اكبر شوي بحيت يغطي الجوانب انا درتهم مربعات ونبدا نطرح بيدي حتى نوصل تقريبا لسمك لي حابة نعدل بالحلال حتى نتخلص من أثار اليد

نطبع بالطابع او نقطع بالطريقة التقليدية انا خليتو ليلة غدوة صباح طيبت ممكن نطيب مباشرة