لازانيا لذيذة

اي نوع لازانيا من السوبر ماركت انا استخدمت الملكة.
طيب سؤال، اللازانيا بتتسلق ولا لا؟
بتتسلق لو هنعملها اشكال زي الرول وممكن نسلقها لو خايفين تطلع معاكم ناشفة بس الطريقة دي هتطلعها تحفة واسمعوا مني ومتراجعوش ورايا😉
البشاميل.. يفرق عن بشاميل المكرونة العاديه في قوامه بيكون اخف شويه ادي اول نقطة‼️.
صوص لحمة البلونيز بيكون كتير شويه ادي تاني نقطة ودول اهم نقطتين عشان تطلع اللازانيا بتاعتكم مستوية من غير سلق‼️.

اللحمة تعصيجتها سهلة.. نص كيلو او على قد اللحمة الي عندكم، و لو دسم اللحمة عالي ننزل بيها الأول قبل البصل ونسبها تأخذ بس لون وننزل بالبصل وفص او فصين ثوم مفرومين وبعدين ننزل بجزرة مبشورة نسبها شويه وبعدين لما تخش في التسوية انزل بالفلفل الرومي واحدتين كدا والمشروم واحدتين متقطعين ومعلقتين صلصة نزود ماء او طماطم مضروبة في الخلاط.
تغلي بس وننزل بالتوابل بقى رشة ملح، فلفل اسود،كزبرة،كمون،رشة زعتر،اوريجانو لو متوفر،مكعب مرقة(ماجي مرق لحم تحفة) او ممكن نكتفي بكل الي فات ده بدون ماجي.

البشاميل عشان ميكلكعش هنحط معلقتين سمنه او زبدة او واحدة كدا وواحدة كدا او زيت وقدهم بنفس المعلقة معلقتين دقيق او ثلاثة ونقلب كل المزيج معاكم نزود المادة الدهنية لحد ما يبقى قوامه حلو ذائب دقيقة وننزل باللبن الساقع ونقلب بمضرب سلك هنضمن بشاميل كريمي تحفة وممكن نضيف كريمة او قشطة لو متوفر لو مفيش عادي انا محطتش اصلا.
هنحط بس شويه جبنة موزاريلا معاهم ونقلب لحد القوام ما يربط كدا، نحط مكعب مرقة، رشة ملح وفلفل اسود، رشة زعتر، بابريكا.
قوام البشاميل عايزاه معقول هنخليه بس خفيف شويه.

اهم حاجة نظبط الملح والمقادير حسب الي متوفر وحسب رغبتكم.. الاكل فن يا جماعة لو حابين تضيفوا او تشيلوا اي حاجة من وصفتكم براحتكم المهم الف هنا وشفا على قلبكم ويارب تجربوها وتعجبكم وكل ده يتعمل على نار هادئة عشان النتيجة تطلع حلوة زيكم💗

بالمناسبة انواع الجبن الي استخدمتها كانت ::
موزاريلا، رومي، فلمنك