نوجد المكونات ونبدأ على بركة الله، في طاس أو غراف كبير حطيت الحليب دافي مع الزيت والخميرة والسكر وحبة بيض كاملة وبياض (الصفار خليتو بجيه للدهن) مع بشر حبة برتقال كبيرة وحبة ليمون أخضر يعطينا ذوق احسن مع كاس فرينة.
ملاحظة مهمة: ✔الكاس اللي عبّت بيه سعته 200 ملل.

وميكسيتهم بالبرا ميكسور جيدا فرغتهم في إناء وغطيتو ببلاستيك شفاف ومن فوق سربيتة وخليتو يتفاعل مدة 20 دقيقة.

كي فاتت 20 دقيقة (ولا كيما الرغوة بسبب تفاعل الخميرة) ضفت عطر مزيج بين الزبدة والفاني وملعقة كبيرة خل وقرصة ملح خلطت الكل بالفوي وبديت نلم بالفرينة مخلطة مه خمارة الحلويات (من الأحسن نغربلوها).

ضفت الفرينة حتى تحصلت على عجينة طرية وتلصق شوية في اليد، ضفت الزبدة طرية بحرارة المطبخ.
ملاحظة مهمة: غيّرت الإناء لأنو جاني صغير على العجينة.

ودخلتها مليح مليح، غطيتها وخليتها تخمر مدة 40 دقيقة بالتقريب (الجو بارد)

كي خمرت هبطت لها لخمور (ديقازيتها) ووزنت 80 حبة للكرية.

كورتم مليح حتى أصبح الوجه أملس وحطيتهم فوق صينية مفرشة بورق الزبدة، وحاولت نبلاطيهم شوية.

في غرفية حليت صفار حبة بيض مع القليل من الحليب والقهوة سريعة الذوبان ودهنت من فوق ودردرت القليل من الجنجلان الأبيض (هذاك اللي كان عندي)

دخلت الصينية للفرن المسخن مسبقا على درجة حرارة متوسطة مدة 25 دقيقة، الصينية الثانية دهنتها ودردت من فوق القليل من السكر بدلا من جنجلان.

جا هشيش ورطب زبدة 👌🏻وبزاف بزاف 🍊😋🍋 بنين وقّدمتو بألف صحة وهنا💖