بسم الله الرحمن الرحيم.. وبنبدا بالبصلة المفرومة عالنار الخفيفه مع زيت الزيتون لتستوي..

بنحط اللحمة المفرومة ولازم تكون برة التلاجة من ساعة عالاقل.. وبنقلبها و بنبهرها (ملح ، فلفل اسود، هيل ، قرفة شوي ، بهارات مشكله ، زعتر اخضر مجفف ، و ريحان مجفف) وبنقلب

بنحط فوقها البندورة وبنقلب

ورب البندورة وبنقلب ، ولما تبدا تدوب البندورة بنضيف الفليفلة المقطعة ناعم "بتقدري تضيفي جزرة مبروشة" وفوقها كمان الزيتون الاسود و الفطر وبنقلبها..

بنتركها وبنعمل البشاميل... ب طنجرة تانية دوبي اصبع الزبدة وضيفي الطحين شوي شوي فوقها مع التحريك المستمر ولما تصير عجينة حطي الحليب فوقها شوي شوي و اخفقي لحتى تصير متماسكة رشي شوية صغيرة من جوزة الطيب و رشة صغيرة ملح

هوت صار عنا طنجرتين والخلطة و البشاميل صارو جاهزين... بنجيب صينية مستطيلة ولو بايركس بيكون احسن... وبنبدا

طبعا اللازانيا طبقات.. اول طبقة بشاميل خفيفة وبنحط طبقة المعكرونة و فوقها البندورة وفوقها بشاميل... بعدين معكرونة وطبقة جبنة وبشاميل.. بعدين معكرونة وهيك

اخر طبقة لازم تكون بشاميل وعالوجه جبنة وحلو لو تتزين بالريحان او الزعتر الناشف مع كم حبة زيتون اسود مقطع

هون بيضل اخر اشي وهو الخبيز... سخني الفرن ع درجة ١٨٠ ولمدة ٣٠ دقيقة ووقتها اتفقديها وحسب رأيك ازا بيلزمها وقت اكتر اتركيها شوي مش اكتر من ١٠ دقايق لانه مكوناتها مستوية مسبقا.. وازا الوجه ضل ابيض اشوي الوجه شوي

ازا بتلاحظي اني ما سلقت شرائح اللازانيا وما غلبت حالي فيها.. بس بنفس الوقت ما نشفت البندورة كتير مشان تساعد المعكرونة ع انها تستوي

طبعا بتقدري تعملي جنبها المقبلات اللي بتحبيها.. وصحتين و هنا ❤