اللحم مفوّر 🥩 مع بطاطا في الفرن

نبدأ أولا بتتبيلة اللحم، في إناء حطيت التوابل (البصل المفروم ناعم، الثوم مبشور، فلفة حمرة،الثوم بودرة مخلطة مع البصل بودرة، القصبر ناشف، الفلفل الأسود، الكركم، سكين جبير، تابل اللحم، الملح حسب الذوق وإكليل الجبل) مع الطماطم المصبرة والموتارد (إضافة إختيارية) مع ملعقة كبيرة خل والزيت خلطت الكل جيدا.

حطيت قطع اللحم في التتبيلة ندير ثقوب بالسكين باش تتشرب مليح كما هو موضح في الفيديو، وندهن اللحم جيدا.

غطيت الإناء ببابي فيلم (بلاستيك غذائي) ودخلتو للثلاجة مدة نصف ساعة.

كي فاتت نص ساعة فرشت ورق الطهي حطيت قطعة واحدة غلفتها مليح، ثم حطيتها في قطعة ألمنيوم وغلفتها مليح مليح، بنفس الطريقة غلفت قطعة اللحم الثانية.

حطيتهم في كسكاس وغلفتو بورق الألمنيوم جيدا عاد حطيت من فوق غطاء الكسكاس.

حطيت الكسكاس فوق القدرة اللي كان فيها الماء غالي على نار متوسطة مدة الطهي من 2 سوايع ونص إلى 3 ساعات حسب حجم قطع اللحم.
نصيحة مهمة: ✨مرة على مرة نفقدو الماء اللي في القدرة كي ينشف نزيدو ماء يكون ساخن جدا (غالي)

كي قرّب يوجد اللحم (نصف ساعة الأخيرة) نقيت البطاطا وغسلتها قطعتها مثل البطاطا المقلية لكن شوية غليظة وتبّلتها في ما تبقى من تتبيلة اللحم ضفت عليها تابل الجبن والفلفل الأحمر الحار خلطتها مليح.

فرشتها في صينية فيها ورق الطهي نحطها متباعدة عن بعضها البعض ونغطيها بورق الزبدة من فوق ودخلتها للفرن المسخن مسبقا على درجة حرارة متوسطة. مرة على مرة نقلبها ونحركها بلطف حتى تستوي وتدي لون ذهبي جميل مدة الطهي تقريبا 25 دقيقة.

في هاذ الوقت يكون اللحم وجد طاب زبدة وطلق العصارة (الصلصة) ديالو، حطيتو في صحن التقديم بيه بالصلصة.

وصاير داير حطيت البطاطا اللي طابت في الفرن، وقدّمت الطبق بألف صحة وهنــا 😋👌🏻😋 وشهية طيبة للجميع🥰