مرقة بالجلبان والجزر

نبدأ على بركة الله، في طنجرة الضغط نحط القليل من الزيت مع حبة بصل مقطعة رقيق وقطعة الدجاج (استعملت من جهة الصدر) والتوابل (الملح، الفلفل الأسود، الكركم، سكين جبير، فلفلة حمرة) وعود القرفة، نقلي الكل مليح على نار هادئة حتى يتقلى الدجاج من كل الجوانب.

نمرق بالمـــاء غالي ما نديرش بزاف ونغلق على طنجرة الضغط، ونخلي الدجاج يطيب على خاطرو تقريبا 20 دقيقة، كي يفوت الوقت المطلوب نحل على الطنجرة نصيب الدجاج طاب نحيه ونحطو في صحن ونخليه بجيه.

في هاذ الوقت نكون حضرت الخضرة تاعي (الجلبان والزرودية والبطاطا) نقيتهم وغسلتهم مليح قطعت الجزر دوائر.

في هاديك المرقة اللي طاب فيها الدجاج نرمي الزرودية والجلبان، نغلق على الطنجرة مدة 5 دقائق نعاود نحل عليها ونرمي حبة بطاطا مقطعة نغلق عليها ونخليها طيب على خاطرها.

منين طيب وتتجمر المرقة وتعقاد، وقبــل ما نطفــي عليها نضيف رشــــة خفيفة نتـــاع سكين جبير نخليها تغلي غلية وحدة ونطفي.

هاذيك الإضافة الأخيرة نتاع سكين جبير تزيدلها في البنة.

كي نرمي الخضرة في الطنجرة ندهن قطعة الدجاج بشوية سمن نمسحو مسحة خفيفة برك وندخلو للفرن المسخن مسبقا يدي لون ذهبي جميل تقريبا مدة 10 دقائق، باش يوجدو مع بعض.

ونسربيه في الطبسي، ويقدم بألف صحة وهنا 😋👌😋 وشهية طيبة للجميع 🥰