تشيز كيك اللوتس

نحضّر كل المكونات ونبدأ على بركة الله، أولا نحضر القاعدة (الطبقة الأولى)، طحنت البسكويت بذوق القرفة بالمطحنة اليدوية كما هو موضح في الصورة، حطيتو في إناء.
ملاحظة: ✔ يمكن إستعمال أي نوع بسكويت متوفر.

ضفت عليه الزبدة المذابة ونخلط حتى نتحصل على خليط رملي، فرّغت هاذ الخليط في المول وخليت مقدار ملعقتين كبار للتزيين من بعد.

سويت السطح مليح ونحاول نضغط عليه بظهر كاس أو ملعقة باش تترسى مليح ويدي شكل القالب، دخلتو للثلاجة.

في هاذا الوقت نوجد كريمة الجبن فيها 3 مراحل، المرحلة الأولى نحط في إناء بودرة الشونتييه مع الحليب البودرة والماء البارد جدا (مثلج) وضربت الكل حتى ثكاثفت الكريمة.
ملاحظة مهمة: ✔الكاس اللي عبرت بيه سعته 200 ملل.

المرحلة الثانية في إناء حطيت الجبن اكريمي مع زبدة اللوتس ومركز عطر السبيكيلوز وضربت الكل جيدا حتى تجانست كل المكونات.
ملاحظة مهمة: ✔الكاس اللي عبرت بيه سعته 200 ملل.

المرحلى الثالثة في إناء فرغت كريمة الخفق السائلة وطلعتها مليح بالباتور (راها بلخف تطلع لأنها باردة جداً).

تحصلت على 3 كريمات، الإناء اللي طلّعت فيه كريمة الشونتيه هو اللي ضفت فوقو كريمة الخفق وكريمة الجبن مع زبدة اللوتس (يعني جمعتهم في إناء واحد).

وعاود ضربت الكل جيدا حتى تجانست كل المكونات وأصبح القوام كريمي.

فرغت خليط كريمة الجبن المتحصل عليها فوق طبقة البسكويت، نحاول نسقم الوجه جيداً نغطيه ببابي فيلم (بلاستيك غذائي) وندخلها للثلاجة تبرد مليح وتتماسك حوالى ساعتين.

ذويت زبدة اللوتس في حمام مائي لتسهيل العملية وفرغت على الوجه، غطيتها لثاني مرة ببابي فيلم ودخلتها للثلاجة فقط مدة ساعة أو لحين التقديم.
نصيحة: ✨ما لازمش نذخلوها للمجمد لأنو كي تجمد دير حبيبات الثلج من الأحسن والأفضل ندخلوها للثلاجة فقط.

عند التقديم ننزع الإطار بكل سهولة. كما هو موضح في الفيديو.

زينتو من فوق بالبسكويت المرمل اللي خليتو على جيه.

وقدّمتــو بألف صحة وهنا 😋👌🏻😋
نضيحة: ✨قسمتو على خمسة كان الجزء شوية كبير يمكن نقسموه لــ10 حصص متوسطة.

جاء بزاف بنين وذوقو جا معتدل ماشي حلو بزاف 👌🏻😋👌🏻 وشهية طيبة للجميع 🥰