طبعا انا بجيب البامية من بالليل اغسلها كويس وهي سليمة واحطها في مصفاة علشان متلزقش في بعضها وتمخط وتاني يوم اجيب البامية واقمعها واضبطها

وبعدين هنجيب حلة على النار ونحط فيها الزيت او السمن وهحط البصل ولما يصفر كدا ويدبل هحط الثوم وهشوحهم كدا مع بعض لحد ما الثوم ريحته تبان وبعدين هجيب الفلفل الحار وهقطعه عليهم واديهم تقليبة حلوة

وبعدين هحط عصير الطماطم عليهم والملح والفلفل الاسود ولما تتسبك كويس هحط كوباية الشوربة اللي عندي وطبعا لو مفيش شوربة عادي هنجيب بدالها كوباية ماية ونخليهم يغلوا كويس وبعدين هحط عليهم البامية واقلبها مرة واسيبهم يغلوا وبعدين احطها على نار هادئة واسيبها لحد ما تستوي

وبعدين اقدمها واحط عليها عصير ليمونة وجمبها فلفل اخضر وبالعيش البلدي

وبالهنا والشفا