لتحضير الطبقة الأولى, اول شي بنحط بطنجرة الحليب وفوقه كاسة السميد.

بنضيف فوقن ٣ حبات مستكة مطحونة.

و٤ ملاعق كبيرة سكر. منخفقن سوا وبنحط الطنجرة على النار.

بس بلش يسخن الحليب, بنضيف ماء الزهر وبنستمر بالخفق.

بس سمك وصار بهذا الشكل, بنطفي الغاز.

بنصب الطبقة الأولى بصحن بايركس وبنساوي سطحها. وبندخلها على البراد حتى نحضر الطبقة التانية.

بنحط بطنجرة الحليب وفوقه النشاء و السكر.

وظرف الفانيليا.

وبنخفقن سوا ليذوب النشا. بعدا بنرفعن على النار وبنضل عم نخفق ليبلش يسمك.

بس سمك, بنطفي النار. بعدا منضيف علبة جبنة الماسكربون أو علبة القشطة الجاهزة, حسب المتوفر. وبنحركن سوا لتمتزج مع بعضها, انا استعملت جبنة ماسكربون.

وتصير بهذا الشكل.

بنصب الطبقة التانية فوق الاولى.

بندخلها على البراد لتبرد. بعدا منزينها بالفستق المجروش كالشكل.

وبنرجعها على البراد لوقت التقديم.

بنحضر القطر, بنحط السكر وفوقه المي وعصرة ليمون بطنجرة على النار. وبنحركن منيح ليختفي السكر. بعدا منتركو يغلي غلوتين تلاتة. بعدا منوطي النار عليه وبنضيف ماء زهر. وبعدا منطفي النار وبنتركه على جنب ليبرد.

عند التقديم, نضع القطر أو الشيرة.

بتمنى تعجبكم.

صحة وهنا.