نجرسكو الفراخ

نقطع صدر الفرخه مكعبات صغيرة او شرايح شبه الشاورما طبعا بعد مانكون غسلناها كويس

نحضر طاسة كبيرة نضع فيها شوية زيت مع ملعقة سمنة او زبدة ونضع فيها البصل شرائح او قطع صغيرة وندبله شوية وبعدين نضع عليه فصين ثوم مفروم ونقلبهم كويس

ثم نضع قطع الفراخ ونتركهم دقيقة وبعدين نضع ملح وفلفل ونقلبهم كويس وتكون النار هادية وكل دقيقتين نقلبهم وناخد بالنا علشان ماتلزقش او تنشف

نقطع حبة الطماطم قطع صغيرة(حسب الرغبة انا بحطها علشان اكسر اللون الأبيض) ونحطها على الفراخ ونقلبهم مع بعض كويس ونحط ملعقة ص بابريكا

لما تلاحظي ان الفراخ استوت تحطي شرايح الزيتون وبعدين شرايح الفلفل الألوان وتقلبيهم كلهم كويس دقيقتين و تطفي النار

لتحضير صوص البشاميل نضع لتر ونص لبن دافي في الخلاط وعليهم نص كوب دقيق ونضربهم كويس جدا ، نجيب حلة كبيرة ونحط فيها ملعقتين زبدة مع ملعقة زيت علشان الزبدة ماتتحرقش او ملعقتين سمنه حسب الموجود عندك وبعدين ننزل عليهم بخليط البشاميل ونفضل نقلب بالمضرب السلك كويس جدا علشان الدقيق مايعملش كتل صغيرة اول ما تلاحظي ان بدأ يتماسك شوية شبه الكريمه السايلة كده لان مش عايزينه تقيل اوي لازم يكون خفيف كريمي لو عندك قشطة بيضا حطي ملعقة وشويه ملح وقلبيهم كويس وبعدين تطفي النار وتاخدي شوية مقدار بولة خليهم على جنب

نضع المكرونه على خليط البشاميل (طبعا المكرونه تكون مسلوقة تلت ارباع سوى علشان مش تبقى معجنه) ونحط عليها الجبن الرومي و الموتزاريلا والشيدر، اي نوع موجود عندك وتقلبيهم كويس هتلاقي الجبنه ساحت وبتمط، وبعدين تحطي خليط الفراخ اللي حضرتيه وتقلبيهم مع بعض كويس جدا

نجيب صينية الفرن ونحطهم فيها ونفرد كويس يبقى كله متساوي وبعدين نحط عليهم شوية البشاميل اللي كانوا على جنب ونفردهم كويس وبعدين نغطي الوش بكل انواع الجبن الموجودة عندك رومي، موتزاريلا، شيدر كله مبشور ودخليها الفرن،، و بألف هنا