في إناء نحط الدجاج المفروم نديرلو حبة بيض و البقدونس الفلفل المقطع شوية ثوم حاجة قليلة وحد فص هكداك وفلفل أسود وملح وشوية كمون قيس نص مغرف صغيرة وشوية شابلور ونجمع المكونات كامل مع بعض حتى نتحصل على خليط متجانس.

بالنسبة للحم المفروم نديرلو واش درنا في خليط الدجاج.

في هاد الأثناء نجيب ورق بلاستيكي غذائي نفرشو في طاولة العمل ونحط فيه خليط الدجاج ونبسطو مليح على شكل مستطيل.ثم نزيد نحط فوقو خليط اللحم ونبسطو مليح.

في هاذي المرحلة نبدا نلف فيهم باستعانة الورق البلاستيكي حتى نوصل للحافة ونغلق عليه مليح ونزيد نلف عليه ورق الألمنيوم ونديرو في سنيوة الفرن تكون فيها ماء وندخلو الفرن

في هاد الأثناء ندير مرق لنرافقو بيه الرولي ديالنا. في قدر أو كسرولة ندير شوية زيت وشوية بصل و عضم الدجاج لي نحيناه من صدر الدجاج باش نزكيو المرق ونخلوهم يتقلاو ثم نضيف شوية فلفل اسود وملح ومعدنوس مقطع رقيق وزيتون اخضر ونمرقو بشوية ماء.

كي يطيب رولي ديالنا اي بس يستوي نخرجو من الفرن ونقليه في شوية زيت أو زبدة باش ياخذلنا اللون الذهبي.

نقطع رولي إلى قطع ونرافقو بمرق الزيتون والبطاطا المقلية.وشهية طيبة