دي اسهل طريقه لعمل الاسبونج, بنحط كل المكونات على بعضها.

ونضربها بمضرب كهربائي, من ربع لتلت ساعة, لحد ما نحصل على قوام كريمي.

نصب الخليط في صينية مدهونة بالزيت ومفروشه بورق الزبدة. وتدخل الفرن على درجه حراره متوسطه. الفرن مسخن مسبقا.

بتقعد حوالي ساعة الا ربع. وبعد ما تطلع من الفرن, نتركها تبرد تماما. وندخلها الثلاجه ترتاح, علشان تكون سهلة التقطيع.

نحط قعده التورته و نحط كريمه علشان تتماسك طبقه الكيكه. ونحط أول طبقه, نسقيها شربات خفيف بارد, او اي عصير, او عصير الكمبوت. بس نسقيها خفيف جداً, علشان مش تعجن.

وبعدين نحط كريمه ولو حبيين ممكن كمان فاكهه, لحد ما نخلص كل الطبقات. ونغلف التورته ويفضل نتركها في الثلاجه, علشان الكريمه تجمد وتكون سهله التذويق.

بعد ما تطلع من الثلاجه, نذوقها حسب الرغبه. دي كانت كريمه بس وشوكولاته كرسبي وسوداني على الجوانب, بس. وبالف هنا.