كيكة قدرة قادر  (كيكة الكريم كراميل)-Cream caramel cake

اول حاجة بنعمل الكراميل ، بنجيب صينية مقاس 26 اللى هنعمل فيها الكيك و نحط فيها كوباية السكر والميه ونحطها عالنار ونقلبها شوية ونسيبها لغاية ما السكر يسيح ونقلبها لغاية ما نتأكد ان السكر ساح تماما و لونه بقي بني فاتح .

هنشيل الصينية من علي النار و نحرك الصينية عشان نتأكد ان الكراميل غطاها كلها ونسيبها على جمب لغاية ما تنشف .

فى الوقت ده هنحضر الكريم نفسه ، هنضرب اللبن والسكر والبيض والفانيليا فى الخلاط مع بعض لغاية ما السكر يدوب و نصب الخليط ده عالكراميل اللى هيكون نشف . ونسيب الصينية على جمب.

بعد كده هنعمل الكيك وفى الوقت ده هنشغل الفرن علي 150عشان نسخنه ، فى الخلاط هنحط البيض و اللبن والزيت والفانيليا والسكر و نخلطهم كويس لحد ما السكر يدوب .

فى طبق كبير هنخلط الدقيق والنسكويك والملح والبيكنج باودر و هنصب عليهم خليط البيض واللبن و نقلب كويس لغاية مالخليط يتجانس، وهيبقي تقيل نوعا ما ولو حاسيناه تقيل اوي نزود ربع كوب لبن .

هنصب خليط الكيك على الكريم كراميل ، محدش يستغرب ازاى بحط سائل على سائل لان ده طبيعي وهي بتتعمل كده والكيك بيفصل عن الكريم كراميل فى الفرن بسبب اختلاف الكثافات وهيبقى الكيك من فوق والكريم كراميل من تحت . المهم هنصب خليط الكيك عالكريم كراميل من غير ما نقلب و بعدين ندخلها الفرن لمدة ساعة او ساعة الا ربع و نكون حاطين الصينية بتاعتنا فى صينية اكبر منها فيها مية سخنة لغاية نصها عشان هنسويها فى حمام مائي .

هنبص عالكيك بعد ما يعدي نص ساعة لو لقينا وشها احمر خلاص واتعمل هنحاول نغطيه بورق فويل عشان ميتحرقش و عشان نسيب الكريم كراميل يكمل سوا .

بعد ساعة الا ربع تقريبا بنخرجها من الفرن ونسيبها تبرد خالص من غير ما نهزها و بعدين ندخلها التلاجة مش اقل من 4 ساعات او ليلة كاملة.

بعد ما نخرجها من التلاجة بنعدي الصينية عالنار دقيقة عشان الكراميل يفك ونعرف نقلبها . بنقلبها فى سرفيس كبير براحة و هيبقي شكلها زي الصورة بالظبط ان شاء الله وبالهنا والشفا.