الفطير المشلتت

ضعي الدقيق في إناء بعد نخله

ثم ضعي عليه الملح والسكر واخلطيهم جيدا

ثم ضعي كوب ماء مضاف عليه ٣ معالق الزيت وده سر نجاح عجينه الفطير واخلطي جيدا

ثم زودي المياه واحده واحده علشان العجينه متبقاش زي المايه وتقعدي تزودي في دقيق

واعجني كويس جدا جدا مده لا تقل عن ١٥ دقيقه ومتقليش المده عن كده وانتي هتشوفي الفرق بنفسك

قسمي العجينه ل ٤ كور متساويين وضعيهم بصنيه بها زيت وغلفيها بكيس واتركيها ترتاح من ساعه لساعه ونص ولو زودتي يبقي احسن كل ما ترتاح تديكي نتيجه افضل

اما ترتاح العجينه كويس شوفي المكان اللي هتفردي عليه العجينه ويستحسن يكون واسع علشان تفردي براحتك وتدهني المكان ده زيت وتبتدي تفردي العجينه بايدك تجيبي اول كوره مثلا تبتدي تبتطيها وتدهني ايدك سمنه وتسيحي في العجينه من جوه لبره هتلاقيها بتتفرد معاكي وبعدين تجيبي طرف العجينه بايدك وتشدي لبره لحد مترققيها خالص

هتجيبي السمنه السايحه علي الزيت وتبتدي تدهني العجيبه يستحسن تدهني بايدك علشان متقطعيش العجينه وتطبقيها زي الظرف وكل جنب تطبقيه لازم تدهنيه سمنه وبعدين تلميها تاني زي الكوره وتضعيها بصنيه بها شويه سمنه وتسبيها ترتاح تاني ساعه وغطي بردو بالكيس علشان متقشفش منك

وتشغلي الفرن علي درجه حراره ٢٢٠ وسبيه يسخن ربع ساعه وبعدين تجيبي اول صنيه وتبطتي الكوره دي تخليها مدوره زي الفطير بتاع بره ومترقيش العجينه اوي علشان متنشفش منك وتتحرق بالفرن ودخليها الفرن وتبعيها من فتره للتانيه لانها مش بتاخد وقت واول متحمر من تحت اقلبيها في ناس بتولع الشواية عليها بس انا بفضل اني اقلبها واول متخرجيها من الفرن غطيها علي طول وكملي الكميه كلها علي كده وكل فطيره تطلعيها تحطيها فوق اللي قبليها البخار بيخلي الفطير طري وتحفه وكلي بقي احلي فطير ممكن تدوقيه بحياتك

ملحوظه : بالنسبه للزيت اللي بالعجينه ده بيديكي نتيجه كويسه جدا للعجينه وانتي بتفرديها وكليو الدقيق بيطلعلك ٤ فطاير متوسطين الحجم

بالنسبه للسمنه والزيت انا بحب احطهم علي بعض ده بيورق الفطير اكتر ما يكون سمنه بس وعن تجربه انا بستعمل مثلا كوب سمنه بلدي علي نص كوب زيت