نكيل 3 كيسان سميد خشن ونزيد عليهم السكر ونخلط حتى يتجانسو مع بعض ثم نزيد الزبدة للأمانة انا درتو بالزيت مكانش عندي الزبدة ونزيد الملح والفانيلا ونخلط جيداً ونزيد نصف كمية الماء ونخلطها ونخليها ترتاح ساعتين ولا تبات انا خلط بي العجانة ولي معندهاش تخلط بين أطراف الأصابع متعجنوش باش تنجحلكم الوصفة

نحضر الشاربات ندير 2 كيسان سكر مع 4 كيسان ماء وشريحة ليمون ونشعل عليها النار كي تغلي نحسب 15 دقيقة ونطفي عليها ونضيف ربع كأس ماء الزهر

كي يرتاح الخليط مكمل كمية الماء المتبقية ونخلط ونفرغ في الصينية ونمشيه بلا منضغط عليه ونسوي الوجه بي ملعقة وبلا منضغط نذوب القليل من الزبدة وندهن بيها الوجه باش نتحصل على لون مليح لقلب اللوز

نقسمو بلا منوصل للتحت غير من فوق ونزينوا بي الكاكاو وندخلو الفرن أطيب في الرف الوسطاني على 200 درجة لمدة ساعة ونصف كي يحمر من الأطراف كيم موضح في الصورة نشعلوا من فوق ونهبط الصينية الى الرف الأول ونخليها تحمر مليح

كي يطيب (يستوي) نخرجو وهو سخون نشربوه بي الشربات تكون باردة حتى يتشرب مليح نخليه 6 ساعات باش نستهلكوه تبعوا الخطوات وانشاء الله تنجحو فيه شكرا حبيباتي