ڨريوش تلمسان

نحضرو الخميرة : 4 مغارف كبار فرينة (طحين او دقيق) ومغرف صغيرة خميرة وعصرة ليمون ونزيدوها الماء ونخلطو مليح حتى يروحو قاع تكتلات ويكون القوام ثقيل شوية كيما اي مثل البغرير ومن بعد نصفوه في علبة زبدة باش نتأكدو ان كل التكتلات مشات ونغطوها ونديروها في الثلاجة لمدة 48 ساعة أو على الأقل 24 ساعة.

نخرج الخميرة قبل ب 3 سوايع باش تتفاعل ونلقاوها دارت الحموضة ولازم تكون قد كاس تاع 250 ميلي ونزيدوها حبة خميرة الحلويات ونخلوها تتفاعل معاها.

نخلط الفرينة (طحين) مع الجنجلان جيداً ، ونزيد الزبدة والزيت ونخلط مليح وقرصة ملح ونخلط مليح نبسس الفرينة (طحين)، رايحة تتكور لينا نجيبو غربال ولا صفاية ونصفوها قاع من دوك الكويرات ومن بعد نزيد البيض والخل وماء زهر ونخلط مليح ونزيد الخميرة

ونلم العجينة لازم لعجينة تكون قاصحة اي نلمدها وخلاص اذا ماتلمدتش بالخميرة لي زدتها ندير ماء دافي وين كانت الخميرة ونشللها بيه ونزيد اي بالقطرات حتى تتلم العجينة ونديرها في كيس بلاستيكي ونخليها ترتاح من ساعة الى ساعتين

بعد مانحله نقطع الجوانب ووندير 3 خطوط والرابع نقطع الحبة وبين الخط والخط تكون المسافة كبيرة ومن بعد نشكل القريوش وحدة لداخل وحدة برا ومن بعد ندخل لي في الوسط ونحطهم في سني ونغطيهم

واذا بغينا نحلو باليد ندو الجزء لي قسمناه ونحلوه طوليا نطووه على اثنين ونحلوها ونعاودو نطووه على اثنين ونحلوه ونعاودو نطووه للمرة الأخيرة ونحلوه رقيق ومن بعد نقطعه بنفس الطريقة الأولى ونظفره.

ومن بعد كي نقلي نقليه في زيت غازرة ويكون ساخن ، الحبة تهبط للتحت نشد الجوانب تاعها بفرشيطة باش مايطلعوش ومن بعد كي يطلع الفوق ندير الزيت من الفوق باش يتنفخ ونخليه يتحمر ونحيه ونخليه حتى يبرد ونعسله ونحطه يقطر ومن بعد نديرله جنجلان