طعام باللحم....طعام ولاد نايل 🇹🇹

نغسل الطعام مليح باش يروح منو الشوائب ونخليه يقطر في كسكاس بعدها نحطو في قصعة باش تساعدنا على العمل ونضيفلو حوالي فنجان الا ربع زيت نباتي عادي ونبدى نفرك فيه بين راحتيّ اليدين وكاني نبسس فيه هاذ العملية تسمى الفتيح يعني نفتح الطعام والحبيبات لي تتكون بعدها نملئ البرمة ماء ونحطها على نار قاوية فوق الطابونة

ونحط الكسكاس فوقها ونخليها تفور الى غاية مانشوف بخار يطلع من الطعام يعني تقريبا مدة نصف ساعة الى 40 دقيقة التوقيت يبقى نسبي فقط يعني على حسب نوعية الطعام بعدما يفير ونشوف البخار المتكاثف نحي

الطعام ونرجعو فالقصعة ونبدى نرش فيه بماء عادي مخلوط مع زيت عادي نرشو ونخلط او نفرك فقط باصابع اليد يعني منعجنش نشربو مليح بعدها نملحو ونكرر العملية مرتين يعني في الاجمال 3 مرات ويكون الطعام واجد بعدها نسمقو بالزبدة الذايبة

المرقة : في كوكوت نرابي الثوم والبصلة نضيف شوي زيت ونغلي نضيف اللحم ونخلط حتى يبياض اللحم نضيف السكر الطماطم المصبرة والتوابل والشيبة نخلط مليح ثم نضيف الخضرة والحمص ونمرق بماء ساخن ثم نملح ونغلق عليه نخليه يطيب (يستوي)مدة 45 دقيقة على نار متوسطة كي يطيب (يستوي)نسقي بيه الطعام