સૌ પ્રથમ દૂધીને ધોઈને છીણી લો...એક કડાઈમાં બે ચમચા તેલ મૂકી ગરમ થાય એટલે જીરું ઉમેરો....જીરું ફૂટે એટલે લીલા મરચાના ટુકડા અને મીઠા લીમડાના પાન ઉમેરો....આદુને છીણીને નાખો....ત્યાર પછી છીણેલી દૂધી ઉમેરી ખાંડ અને દૂધીના ભાગનું ફરાળી મીઠું નાખી ઢાંકીને ચડવા દો.....વચ્ચે વચ્ચે હલાવતા રહો....

ત્યાર પછી બે થી ત્રણ બટાકા છાલ સાથે છીણી લો...બે વખત પાણી બદલી ધોઈ લો એટલે વધારાનો સ્ટાર્ચ નીકળી જાય...હવે દૂધી ચડી જવા આવી છે એટલે બટાકાનું છીણ ઉમેરી તેના ભાગનું મીઠું ઉમેરો...હલાવી મિક્સ કરીને ઢાંકણ ઉપર પાણી રાખી ઢાંકીને ધીમા ગેસ પર ચડવા દો...હલાવીને ચેક કરતા રહો...

હવે એક બીજી કડાઈ અથવા પેન માં બે ચમચા તેલ મૂકી જીરું ઉમેરો ફૂટે એટલે પલાળેલા સાબુદાણા હાથે થી છુટ્ટા કરી વધારો....તેના ભાગનું મીઠું અને એક ચમચી લાલ મરચું નાખી બરાબર મિક્સ કરી એક મિનિટ સાંતળો....હવે દૂધી બટાકા વાળું મિશ્રણ તેમાં ઉમેરી હળવા હાથે બધું મીક્સ કરી દો...જરૂર લાગે અને પસંદ હોય તો વધારે ખાંડ- લીંબુ ઉમેરી શકો....

તો તૈયાર છે આપણી ઉપવાસ માં લઈ શકાય તેવી ફરાળી દૂધી સાબુદાણા ની ખીચડી...દહીં સાથે સર્વ કરો...