સૌપ્રથમ મકાઈ તથા સાદા પૌવાને ચાળી લેવા. એક કડાઈમાં તેલ ગરમ કરવા મુકો અને મકાઈના તથા સાદા પૌવા ને તળી લો. ડીશ ઉપર એક પેપર નેપકીન મુકી કાઢી લો.

હવે બેસનમાં મીઠું, હળદર નાંખી અને ફ્લોઈંગ consistency વાળું ખીરું તૈયાર કરો. હવે તેમાં બેકિંગ સોડા નાખી હલાવી લો. તેલ ની કડાઈ ગરમ કરવા મૂકો. બુંદીના ઝારાની મદદથી બુંદી પાડી લેવી. બુંદીને એકદમ ક્રિસ્પી તળવી.તેને પણ પેપર નેપકીન ઉપર કાઢી લેવી.

બેસનમાં હળદર મીઠું હિંગ અને તેલનું મોણ નાંખી બરાબર મિક્સ કરી લો. ત્યારબાદ ઢીલો લોટ તૈયાર કરો. આ લોટને દસ મિનિટ માટે ઢાંકી રાખો. ત્યારબાદ તેને બંને હથેળીમાં તે લગાવી smooth કરી લેવો. તેલની કડાઈ ગરમ કરવા મૂકો. સેવના સંચામાં તેલનું ગ્રીસિંગ કરી તેમાં લોટ ભરી અને સેવ બનાવો. ત્યારબાદ તેમાં શીંગદાણા પણ તળી લેવા. હવે મકાઈના પૌવા,સાદા‌ પૌવા,સેવ,બુંદી શીંગદાણા બધું જ એક મોટા વાસણમાં મિક્સ કરો. જરૂરિયાત પ્રમાણે મીઠું, દળેલી ખાંડ, આમચુર પાઉડર, લાલ મરચા પાઉડર તથા ગરમ મસાલો નાખો.

એક વઘારીયા માં 2 ટેબલસ્પૂન તેલ મૂકો. તેલ ગરમ થાય એટલે તેમાં લીલા મરચા ના કટકા, લીમડી, તલ, વરીયાળી નાખી દેવા. ત્યારબાદ તેમાં હળદર નાખી અને તરત જ આ વઘાર ચૌવાણા ઉપર રેડી અને બધું મિક્ષ કરી લેવું. આ ખટમીઠું ચવાણું એર ટાઈટ ડબ્બામાં ભરી લેવું.