સૌ પ્રથમ ચોખા, મગની દાળ અને તુવેરની દાળને ભેગા કરીને ધોઈ લેવા. ત્યારબાદ તેમાં પાણી ઉમેરીને તેને 15 મિનિટ માટે પલાળી રાખવા. હવે એક કુકરમાં આ બધી વસ્તુઓ ઉમેરીને એની સાથે શીંગદાણા અને બટાકાના ટુકડા ઉમેરવા. હવે તેમાં હળદર અને મીઠું ઉમેરીને ચાર કપ પાણી ઉમેરીને પ્રેશર કુકરમાં ત્રણ થી ચાર વ્હિસલ વગાડી ખીચડી બનાવી લેવી. કુકર ને એની જાતે ઠંડુ થવા દેવું.

હવે એક પોટ માં તેલ અને ઘી ગરમ કરવા માટે મૂકવું. હવે તેમાં બધા આખા મસાલા ઉમેરી લેવા. ત્યારબાદ તેમાં રાઈ ઉમેરીને રાઈને ફૂટવા દેવી. હવે તેમાં જીરું ઉમેરી જીરુંનો રંગ બદલાય એટલે એમાં હિંગ અને કરી પત્તા ઉમેરવા. હવે તેમાં કાંદા ઉમેરીને કાંદા હલકા ગુલાબી રંગના થાય ત્યાં સુધી સાંતળવા. ત્યારબાદ તેમાં આદુ-મરચા-લસણની પેસ્ટ ઉમેરીને બધું બરાબર હલાવી લઈને મીડીયમ તાપ પર અડધી મિનિટ માટે સાંતળવું.

હવે તેમાં ટામેટા ના ટુકડા અને એની સાથે બધા સુકા મસાલા ઉમેરીને બરાબર હલાવી લેવું. ટામેટાના ટુકડા પોચા થઈ જાય ત્યાં સુધી પકાવવું. હવે તેમાં ગાજર, ફણસી, લીલા વટાણા ઉમેરીને બરાબર હલાવી લેવું. ત્યારબાદ તેમાં કાજુ અને દ્રાક્ષ ઉમેરવા.

હવે તેમાં તૈયાર કરેલી ખીચડી ઉમેરીને બરાબર હલાવી લેવું. ત્યારબાદ જરૂર પ્રમાણેનું ગરમ પાણી ઉમેરીને બરાબર હલાવી લઈને લગભગ 8-10 મિનિટ સુધી મીડીયમ તાપ પર પકાવી લેવું. ખીચડીમાં જરૂરિયાત મુજબ વધારે કે ઓછું પાણી ઉમેરી શકાય. ઢીલી ખીચડી પસંદ હોય તો વધારે પાણી ઉમેરવું. હવે તેમાં લીલી ડુંગળી અને લીલા ધાણા ઉમેરીને બરાબર હલાવી લઈને ગેસ બંધ કરી દેવો.

ગરમા ગરમ ખીચડી ને ઘી ઉમેરીને પીરસવી. રજવાડી ખીચડી ગુજરાતી કઢી, ખાટું અથાણું અને પાપડ કે ચોખાની પાપડી સાથે ખૂબ જ સ્વાદિષ્ટ લાગે છે.