பன்னீரை சிறு சிறு துண்டுகளாக நறுக்கி எடுத்துக் கொள்ளவும். வெங்காயம், தக்காளியை பொடிதாக நறுக்கிக் கொள்ளவும். பச்சைமிளகாயை நீளவாக்கில் கீறி எடுத்துக் கொள்ளவும். பட்டாணியை 6 மணி நேரம் ஊற வைத்து தண்ணீர் வடித்து எடுத்துக் கொள்ளவும். கடாயில் எண்ணெய் ஊற்றி பன்னீரை சிறிது வதக்கி தனியே எடுத்து வைத்துக் கொள்ளவும்

கடாயில் மீதமுள்ள எண்ணெயில் பட்டை, பூ, இலை, சோம்பு, வெந்தயம் தாளிக்கவும். பிறகு பச்சை மிளகாய் சேர்த்து நன்கு வதக்கவும்

இப்போது கருவேப்பிலை, வெங்காயம், தக்காளியை சேர்த்து ஒரு நிமிடம் நன்கு வதக்கவும்

பிறகு பட்டாணியை சேர்த்து மிதமான தீயில் வைத்து 5 நிமிடங்கள் நன்கு வதக்கவும் இதிலேயே பட்டாணி அரை பதம் வெந்து விடும். இந்த இடைவெளியில் அரைக்கக் கொடுத்துள்ள தேங்காய், சோம்பு, பொட்டுக்கடலையை நைஸாக அரைத்து விழுதாக எடுக்கவும்.

இந்த விழுதை வதங்கிக் கொண்டிருக்கும் பட்டாணியுடன் சேர்க்கவும். பிறகு மிளகாய் தூள், மல்லித்தூள் சேர்த்து நன்கு வதக்கவும்

பிறகு மஞ்சள் தூள் சேர்த்து நன்கு வதக்கி ஒன்றரை கப் தண்ணீர் சேர்த்து தேவையான அளவு உப்பு சேர்த்து ஒரு கொதி வந்ததும் மிதமான தீயில் 15 நிமிடங்கள் வைத்திருக்கவும். இப்போது மசாலா பச்சை வாசனை போய் பட்டாணியும் வெந்திருக்கும்.

இறுதியாக பன்னீரை சேர்த்து அடுப்பை அணைக்கவும். பன்னீர் பட்டாணி குருமா. சாதம், சப்பாத்தி, புல்கா, நாண், இட்லி, தோசைக்கு சைட் டிஷ்