அரை கப் துவரம் பருப்பை கழுவி 3 கப் தண்ணீர் சேர்த்து குக்கரில் வைக்கவும். அதில் கால் ஸ்பூன் விளக்கெண்ணெய் மற்றும் மஞ்சள் தூள் சேர்த்து 5 விசில் அல்லது பருப்பு நன்கு குழைய வேகவைக்கவும். கத்திரிக்காயை படத்தில் காட்டியுள்ளபடி அரிந்து கொள்ளவும். நீளவாக்கில் அரியாமல் குறுக்கு வாக்கில் அரியவும். ஒரு முழு பூண்டை தோல் உரித்து வைத்துக் கொள்ளவும். சிறிய வெங்காயத்தை தோலுரித்து நீளவாக்கில் இரண்டு இரண்டாக அரிந்து கொள்ளவும். ஒரு பெரிய நெல்லிக்காய் அளவு புளியை தண்ணீரில் ஊற வைத்து கரைத்து வைத்துக் கொள்ளவும்.

ஒரு பெரிய வாணலியில் ஒரு டீஸ்பூன் எண்ணெய் சேர்த்து வெங்காயத்தை சேர்த்து லேசாக வதக்கவும். பிறகு பூண்டு பல்கலை சேர்த்து சிறிது வதக்கவும். சிவக்க வதக்க வேண்டாம். வாசம் வந்தால் போதும். பிறகு அதில் மூன்று ஸ்பூன் சாம்பார் தூள் மற்றும் உப்பு சேர்த்து லேசாக வதக்கவும்.பிறகு கத்திரிக்காயை சேர்த்து கொள்ளவும். சிறிது வதக்கவும்.(கத்தரிக்காயை எப்பொழுதும் அரிசி கழுவிய தண்ணீர் அரிந்து போட்டால் கருக்காது. மேலும் அரிசி கழுவிய தண்ணீரில் காயை வேக வைத்தால் சுவை கூடும்.)

மிதக்கும் அளவிற்கு அரிசி கழுவிய தண்ணீர் சேர்த்து(சுமார் ஒரு டம்ளர் அளவு தண்ணீர்) காயை வேக விடவும். கத்தரிக்காய் வெந்த பிறகு நன்கு வேக வைத்த பருப்பை சேர்த்து 5 நிமிடம் கொதிக்க விடவும். இப்போது கரைத்த புளித்தண்ணீரை சேர்த்து கொள்ளவும். இந்த குழம்பிற்கு காரம் அதிகமாகவும் புளி குறைவாகவும் சேர்த்தால் சுவை அதிகமாக இருக்கும்.

புளி தண்ணீர் பச்சை வாசம் போகும் வரை கொதிக்கவிடவும் தேவையென்றால் கொஞ்சமாக தண்ணீர் சேர்த்துக் கொள்ளவும்.தாளிக்கும் கரண்டியில் எண்ணெய் சேர்த்து சூடானதும் அதில் கடுகு உளுத்தம் பருப்பு பெருங்காயத் தூள் வரமிளகாய் கறிவேப்பிலை தாளித்து குழம்பில் சேர்க்கவும்.