அரை லிட்டர் திக்கான பாலை காய்ச்சி ஆறவைத்து உறை ஊற்றி கொள்ளவும். (அல்லது கெட்டியான புளிக்காத தயிர் மூன்று கப் எடுத்துக் கொள்ளவும்.)உறை ஊற்றிய பால் தயிர் ஆனவுடன் தயிரை ஒரு மெலிதான துணியில் அடியில் வலை வைத்து தண்ணீரை நன்கு வடித்துக் கொள்ளவும். பிறகு இதை ஆறு மணி நேரம் வரை ஃப்ரிட்ஜில் வைத்து கொள்ளவும். இப்போது தயிர் தண்ணீர் வடிந்து கெட்டியாக கிரீமியாக இருக்கும். இதை நன்கு கரண்டி கொண்டு பீட் செய்து கொள்ளவும்.

4 மீடியம் சைஸ் உருளைக்கிழங்கை வேகவைத்து தோலுரித்து நன்கு பிசைந்து கொள்ளவும். ஒரு கப் அளவிற்கு பனீரை துருவி வைத்துக் கொள்ளவும். மசாலாப் பொருட்கள், கொத்தமல்லித்தழை, இஞ்சி பூண்டு விழுது தயார் செய்து வைத்துக் கொள்ளவும்.

தயிருடன் மசித்த உருளைக்கிழங்கு, துருவிய பனீர், மசாலா சாமான்கள், பொடியாக அரிந்த பச்சை மிளகாய், ஓமம் மற்றும் பொடியாக அரிந்த கொத்தமல்லித் தழை, இஞ்சி பூண்டு விழுது உப்பு எல்லாவற்றையும் நன்றாக கலந்து வைத்துக் கொள்ளவும். இரண்டு ரொட்டித் துண்டுகள் எடுத்து இரண்டு புறமும் நெய் தடவி வைத்துக் கொள்ளவும். தயிர் பனீர் கலவையை ஒரு ரொட்டித் துண்டில் வைத்து இன்னொரு துண்டால் மூடி கொள்ளவும்

இதை பிரட் சாண்ட்விச் மேக்கரில் வைத்து மூடி டோஸ்ட் செய்து கொள்ளவும். அல்லது தோசைக்கல்லில் நெய் அல்லது வெண்ணெய் தடவி டோஸ்ட் செய்து கொள்ளவும்.

இதில் நீங்கள் சில்லி சாஸ் ஆனியன் தக்காளி சேர்த்து கூட டோஸ்ட் செய்து கொள்ளலாம். சுவையான தஹி பனீர் பிரட் சாண்ட்விச் தயார். தொட்டு கொள்ள தக்காளி சாஸ் வைத்துக் கொடுக்கவும்.