الاول هناخد حته خميرة و نحطها ف نص كوبايه مايه دافيه و نحط معاهم معلقه سكر و نلقبهم و يدوبو و نحطهم ف الطبق العميق اللي هنعجن فيه و نحط معاهم نص كوبايه دقيق و نسيبهم نص ساعه او ساعه

بعدين نحط الدقيقه علي الخميرة اللي عملناها و نحط ذرة الملح و نحط خميرة تاني و الزبادي او اللبن و نعجن لحد ما نلاقي العجينه بتلم و مش بتلزق ف الايد

و بعدين نحط الزيت بالتدريج لحد ما نلاقي العجينه شربته وونعجن كويس و بعدين نسيب العجينه ف مكان دافي الفرن مثلا لما تخمر

بعدين ف الوقت دا نجهز الفراخ الحشوة نجيب طاسه نحط فيها معلقتين زيت و نحط البصل بعد ما قطعناه و نشوحه لحد ما يدبل و نحط الفراخ و بعدين الفلفل و نقلب و نحط التوابل و الملح و نزود ربع كوبايه مايه و نسيبهم ع النار شويه علشان يتشربوا من بعض

تكون العجينه اختمرت ناخدها نقطعها دواير كدا متكونش كبيرة اوي تكون متوسطه شويه بعدين ناخد كل دايرة نفردها و نحط الحشوة و نقفلها

ممكن نعملها مربعه او نص دايرة زي القطايف اي شكل بقا تحبيه

بعدين تجيبي صينيه و تدهنيها زيت و تحطي فيه الفطيرات اللي عملتيها و تحطيها ف الفرن

انا بشغل الفرن و الشوايه مع بعض علشان يبقي بسرعه و نلاحظهم دايما علشان بيستوو بسرعه مش بياخدو وقت

بعدين نلاقي الوش احمر و من تحت بردك احمرت نحوشها و نرش ع الوش شويه مايه علشان ميبقاش ناشف و بالهنا و الشفا