نبدأ على بركة الله، نفرغ الماء الساخن جدا على كل من الكليلة اليابسة (باش ترطاب شوية) والفول اليابس وحتى الخليع (باش تتنحى الملوحة الزائدة) حوالي نص ساعة قبل ما نبدا ونقي الخضرة اللي نحتاجها (البصل، الجزر، واللفت)، في طنجرة الضغط نحط الزيت والسمن مع البصلة مقطعة قطع عشوائية وكاس طماطم مجمدة محضرة من قبل كنت 👈🏻حطيت الطريقة يمكن تفقد الوصفة من خلال هذا الرابط👇🏻

نصفّي الخليع ونغسلو بالماء بارد نضيفو على الطنجرة ثم نضيف الحمص كان عندي مرطب في المجمد وفي الأخير نضيف عليهم التوابل (الملح، الكركم، سكين جبير، الفلفل الأسود، الفلفلة حمرة، راس الحانوت مع عود القرفة) ونقلّي الكل جيدا على نار متوسطة.

نصفي الفول اليابس ونضيفو على باقي المكونات نقلي الكل ونمرّق بالماء يكون ساخن جدا.

قبل ما نغلق على الطنجرة ضفت مزيج بين القصبر والمعدنوس وباقي الخضر (الجزر، اللفت، الكابويا الحمرة والثوم) وغلقت على طنجرة الضغط وخليتها تصفر.

في هاذ الوقت غسلت البركوكس جيداً بماء الحنفية ونخليه جانبا يستقطر حتى ينشف تماما، نميل القصعة باش نتخلص من الماء الزائد، قبل ما نفورو ندهنو دهنة خفيفة بالزيت وعمرتو في الكسكاس وحطيتو يفور التفويرة الأولى، كي فار قلبتو في القصعة وبديت نرشو بالماء (مانديرش الماء دفعة واحدة لازم نديرو على دفعات).
ملاحظة: ✔البركوكس اللي استعملتو مفتول باليد

حطيت الملح حسب الذوق خلطت الكل جيدا ونخليه يتشرب مليح حتى يبرد، عاود عمرت البركوكس في الكسكاس ونحطو يفور للمرة الثانية، كي فار للمرة الثانية حطيتو في القصعة وحليتو بلا ما نرشو.
ملاحظة: ✔فورتو مرتين فقط لأنو راح يكمل طيابو في المرق.

نحل على الطنجرة نلقى الخضرة والخليع طاب نصفي في الكسكاس كما هو موضح في الفيديو.

نحي جزء من الحمص وكل الخليع وباقي الخضر نفرغهم في الآشوار ونطحنهم مليح.

نفرغ الخليط اللي تحصلنا عليه في المرق اللي راه فوق النار يغلي ثم نضيف الكليلة كنت صفيتها.

ونعاود نرجّع الخليع والحمص للطنجرة ونخليها تغلي، من جهة أخرى نحضر العقدة، ديت القليل من المرق وحطيتو في الآشوار وضفت الثوم مع الطماطم المصبرة وتابل الخاص بالبركوكس والكروية مع ملعقة كبيرة قصبر أخضر مقطع رقيق كن عندي في المجمد وعاود طحنت الكل جيدا.

فرغت العقدة على المرق وخليتها تغلي تقريبا 5 دقائق.

كي توجد المرقة نقص شوية في كاسرونة ونرمي عليها البركوكس ونخلط مليح.
ملاحظة مهمة: ✔المرقة مانديرهاش كامل يمكن البركوكس ينشف نضيف من ذيك المرقة اللي نخليها بجيه.

نخليه يغلي باش يتشرب النكهات وقبل ما نطفي نضيف القليل من الكمون و ملعقة كبيرة من السمن الحر (دهان لعرب) ونخلط مدة 5 دقائق ونطفي عليه.
ملاحظة: ✔يمكن إضافة قرن فلفل حار يزيد في البنة انا مكانش عندي.

وقدّمتــو وبألــــف صحة ولهنا 😋👌🏻😋

يجي بزاف بزاف بنين 👌🏻😋👌🏻 وشهية طيبة للجميع🥰