نبدأ بسم الله ونجيب صدر دجاج نغسلو مليح ونقطعو شرائح طوليا ثم نجيب 2حبات طماطم نرحيهم فالاشوار ونوجد التوابل لي راح نحضر بيهم الصلصة

نجيب مقلاة نحط فيها ما ك زيت ونحطها على النار ثم نحط شرائح الدجاج ونضيف عليهم ملح ورشة فلفل اسود ورشة توابل شاورما ورشة راس الحانوت ونخلط ونقلي اللحم مليح

بعد ماطاب اللحم نحطو في صحن وفي نفس المقلاة نضيف الطماطم المرحية ونضيف سنات ثوم مرحيين ونضيف ما ك طماطم مصبرة وعكري حلو وفلفل اسود وتابل دجاج وراس الحانوت ونقلي الصلصة مليح ثم نضيفلها 2كاس ماء ونخليهت تطيب اي تستوي

بعد ذلك نضيف قطع اللحم الى الصلصة ونخلي الصلصة تطيب اي تستوي ثم نجيب معكرونة الفراشات رطل انا اخذت منو 300غ فقط

نجيب كسرونة واسعة نحط فيها كمية مليحة من الماء ونضيف ما ص ملح ونخلي الماء يغلي نضيفلو ما ك زيت ونضيف معكرونة الفراشات ونبقا نحرك فيها حتى تطيب اي تستوي مليح ونصفيها في كسكاس

بعد ذلك نضيف مباشرة المعكرونة عالصلصة ونخلطها مليح حتى تتشرب المرق مليح ونطفي النار عليها

فالاخير نجيب صحن التقديم ونحط الباستا بصدور الدجاج وقدمتها مع حميص حار